BOBONARU, 13 Maiu 2025 (TATOLI)—Xefe sentru saúde Komunitária (SSK) postu administrativu Maliana, munisípiu Bobonaru, Nascimento Mau Leto, konfirma daudaun ne’e SSK Maliana iha de’it infermeiru na’in-tolu (3), tanba ne’e seidauk sufisiente atu halo atendimentu ba populasaun Maliana ne’ebé númeru boot ho nia totál aldeia 39 no suku hitu (7).
Notísia Relevante: SSK Maliana rejista ema 1,628 sofre moras IRA
“Infermeiru mak na’in-tolu de’it inklui ha’u no infermeiru ida moras Stroke Ringan hela, ne’ebé ami infermeiru mak menus. Ami presiza tan infermeiru na’in-neen (6) ka hitu (7) para aban bainrua sala maternidade ne’e konstrui hotu ona, ami bele halo pikete kalan. Tanba turnu ne’e ne’e presiza médiku, parteira no infermeiru hamutuk na’in-tolu (3) para bele kompleta malu. Infermeiru nia servisu ne’e multi-funsaun,” Nia imforma ba Agência Tatoli iha nia kna’ar fatin, segunda ne’e.
Nia hateten, aumenta infermeiru ne’e hodi reforsa atendimentu saúde ba pasiente sira-ne’ebé mai konsulta direta no programa vizita suku inklui halo atendimentu ba inan isin-rua sira, bainhira konstrusaun sala maternidade foun konklui iha fulan-Agostu tinan ne’e.
Alende ne’e, nia dehna, SSK mós halo atendimentu ba komunidade viziñu sira ne’ebé iha área Diru-Aban, postu administrativu Atabae, Samutaben no Manapa, postu administrativu Kailaku, inklui suku aldeia balu iha suku Leo-lima, postu administrativu Balibo.
Maske SSK Maliana menus infermeiru maibé jerálmente atendimentu saúde sei kontinua la’o normál.
“Ami-nia parteira ho médiku sira mós bele hala’o servisu infermeiru sira-nian. Ami servisu nafatin tuir saida mak komunidade presiza, ne’ebé durante ne’e seidauk iha problema ida,” nia hateten.
Jestór ne’e afirma, daudaun ne’e SSK Maliana seidauk halo atendimentu partus tanba laiha espasu propriu.
Aleinde ne’e, nia sente orgullu tanba Autoridade Munisípiu Bobonaru iha fulan ne’e, hahú implementa ona projetu konstrusaun sala maternidade.
“Ami hein obra ida-ne’e kle’ur ona, tanba ami-nia fatin ida-ne’e klo’ot, ema tama hotu mai, lahtene pasiente iha ne’ebé no ami atu ba ne’ebé. Sente ladi’ak, entaun aban bainrua obra ne’e hotu, bele fahe parteira ho médiku no infermeiru sira ba iha ne’ebá tanba espasu luan ona. Ami bele halo atendimentu di’ak liután,” nia dehan.
Enkuantu SSK Maliana iha profisionál saúde na’in-20-resin, ne’ebé kompostu husi parteira na’in-neen (6), médiku na’in-neen (6), infermeiru no dentista na’in0eua (2), farmasista na’in-rua (2), laboratóriu na’in-haat (4), administrasaun na’in-ida (1) no ofisiál formasaun na’in-ida (1), profisionál Saúde hirak ne’e balun destaka iha postu saúde iha suku Saburai no postu Saúde Nunutanan.
Notísia Relevante: SSK Maliana rejista kazu Dengue iha suku haat
Jornalista : Sergio da Cruz
Editór : Cancio Ximenes
