DILI, 13 Maiu 2025 (TATOLI) – Arsebispu Metropolitana Dioseze Dili, Dom. Virgílio Kardeál do Carmo da Silva hamutuk ho kadiál na’in-80 husi nasaun oioin foin primeravez partisipa iha konklave, iha Vatikanu-Roma.
Arsebispu Metropolitana Dioseze Dili, Dom. Virgílio Kardeál do Carmo da Silva haktuir kardeál sira ne’e antuziasmu no erguida tanba dehan katak bainhira ita sai husi ne’e ita lahatene katak saida mak akontese.
Na’i-lulik kreda Katólika Timor-Leste ne’e konta, ninia lala’ok ne’e kapás loos, furak no ambiente ne’ebé mak furak tebtebes.
“Nune’e ba ha’u, primeiru ha’u dehan katak ne’e eleisaun ida-ne’ebé la’ós hanesan eleisaun ne’ebé baibain ita halo hanesan eleisaun ba polítiku ida ka mundu ninian tanba ami ba ne’e nein ema ida atu ko’alia kona-ba kandidatu iha ne’ebá, lalori kandidatu ida, kandidatu sira-ne’e kuandu votasaun mak foin ita haree, tanba hahú enkontru dahuluk mosu sira na’in-tolu mak naran boot ida ho votus 26, ida ho votu 25, ida seluk ne’e ninia votus maizmenus besik ba iha 20”, arsebispu informa ba jornalista sira iha salaun VIP Aeroportu Nicolau Lobato, Dili, ohin.
“Nune’e iha ne’e fó ona hanoin ba ema katak ita koñese ona ida-ne’ebá hakarak ida-ne’e no buat ne’e hotu envolve iha laran. Entaun iha segundu enkontru votasaun kandidatu ida-ne’ebé ninia votus antes iha 25 no 26, maibé iha segundu votasaun ida-ne’ebé ho votus 26 ne’e sa’e kedas ba fali 50 votus, tan husi ne’e haree ona katak ema ne’e ninia hakarak ne’e atu ba iha ne’ebé?”, kardeál hatutan.
Aleinde ne’e, líder igreja Katólika timor-oan ne’e, “Tuir ami mós koñese malu ona no bainhira iha votasaun datolu nian ninia votus ne’e sa’e maka’as ba liu ona 86. Ne’e hatudu katak bainhira nia mai ho votus ne’ebé aas kedas entaun tuirmai ne’e reforsa tan de’it ona no ita mós komesa koñese ema ne’e ho kualidade oinsá ne’e.
Arsebispu Metropolitana Dioseze Dili, Dom. Virgílio Kardeál do Carmo da Silva esplika, ambiente ne’e atu hatudu mai ita, haree ba buat ida de’it katak husi nasaun ida-idak ne’e ba lori ninia kandidatus ka igreja ida-idak ba lori ninia kandidatu maibé ita buka de’it saida mak Maromak hakarak duni iha tempu ida-ne’e ema ida oinsá atu segura Papa no hakuak ema hotu inklui hatan ba desizaun igreja nian iha mundu ida agora nian.
Ida-ne’e sei husik hela marka ida ba ita hotu katak iha loron 09 fulan Maiu ne’e sei sai hanesan loron importante ida no fó hanoin ba ita kona-ba loron eleisaun Papa Leão XIV ninian.
“Tanba uluk para Francisco nia loron eleisaun ita sempre hanoin iha loron 13 Marsu, maibé agora ita iha Papa foun ne’ebé ninia loron eleisaun ne’e lahanesan entaun ita tenke hanoin no reza ba nia”, nia akresenta.
Aleinde ne’e misa inagurál Papa foun nian Arsebispu la marka prezensa tanba iha asuntu balun ne’ebé presiza rezolve iha dioseze maibé sei promete hodi reza nafatin ba nia hodi haraik nia bensaun ba sarani sira hotu liuliu ba Timor-Leste.
Notísia relevante:Dom Virgílio hetan konvite husi Dekanu Kardeál hodi partisipa votasaun ba Papa foun
Jornalista: Alexandra da Costa
Editór: Rafael Ximenes de A. Belo
