BAUKAU, 13 Maiu 2025 (TATOLI)–Komandu Polísia Nasionál Timor-Leste (PNTL) Munisípiu Baukau rejista ona kazu rasta faru Padre David Savio, SDB, ba Ministériu Publiku hodi kontinua iha Tribunál Distritál Baukau (TDB).
Kazu referidu akontese iha Igreja Parókia Santa Terezinha Kelikai, Segunda (12 Maiu), bainhira suspeitu mane ho inisiál SdC idade 34 suspeitadu ba ameasa no rasta vítima hodi rezulta kamiza nakles hafoin mosu dezentendimentu relasiona ho prosesu trata sertidaun batizmu.
“Hakarak ka lakohi kazu ne’e tenke bá-oin. Ita orienta investigasaun prosesu ba Ministériu Públiku (MP),” Komandante PNTL Interinu Munisípiu Baukau, Superintendente João Sancho Pires hateten iha ninia kna’ar fatin, Vila Nova, tersa ne’e.
Superintendente Pires hateten mezmu vitíma hato’o ona esplikasaun relasiona ho prosesu tratamentu sertidaun tarde tanba pesóal funsionáriu ne’ebé responsabiliza ba sertidaun sei iha faze tratamentu kondisaun saúde tanba moras, maibé autór kontinua ameasa no hamosu asaun iha kartóriu.
Notísia relevante: Suspeitu rasta faru Padre Savio iha ona sela detensaun
Parte seguransa liuhosi Eskuadra PNTL Kelikai to’o kedas iha lokál akontesimentu hodi asegura suspeitu no transporta kedas ba Komandu Polísia hodi kontinua prosesu investigasaun no detein iha sela detensaun.
“Hakarak ka lakohi kazu ne’e bá-oin, maibé depende ba Tribunál mak haree asuntu ne’e,” Superintendente Pires relata.
Entretantu, kazu referidu PNTL Baukau liuhosi Seksaun Serbisu Investigasaun Kriminál (SIK) rejista iha MP ho Nuc. 0015/25.BCQLC hodi hein prosesu iha Tribunál Distritál Baukau.
Jornalista: Natalino Belo
Editór: Xisto Freitas da Piedade
