DILI, 13 Maiu 2025 (TATOLI) – Meza Parlamentu Nasionál (PN), liuhusi reuniaun plenária, tersa ne’e, halo anúnsiu admisaun no baixa ba Komisaun G, ne’ebé trata Asuntu Edukasaun, Juventude, Kultura no Sidadania, Projetu Lei n.u 8/VI (2a)-Aprova Lei Baze Edukasaun Pré-Eskolár, Ensinu Báziku no Sekundáriu.
Aleinde ne’e, modalidade espesiál edukasaun eskolár, edukasaun estra-eskolár no formasaun profisionál no revoga lei n.u 14/2008, 28 Outubru, Lei Baze Edukasaun.
Meza baixa mós proposta-lei n.u 17/VI (2ª) alterasaun daruak lei n.u 7/2022, 19 Maiu, kona-ba Estatutu Ministériu Públiku, ho pedidu urjénsia ba Komisaun A ne’ebé trata Asuntu Justisa no Konstituisionál.
“Anúnsiu admisaun baixa ba komisaun, ha’u husu para hala’o serbisu”, Prezidente Parlamentu Nasionál, Maria Fernanda Lay, fó sai iha sala plenária.
Meza seidauk fó sai kona-ba konteúdu inisiativa lejizlativa rua ne’e, tanba komisaun sei halo uluk apresiasaun inisiál.
Prezidente Komisaun A, Patrocínio dos Reis Fernandes, hateten kona-ba proposta-lei n.u 17/VI (2ª) tanba komisaun preparada ohin no aprova kedas relatóriu paresér no submete kedan.
“Ami sujere para bele konvoka reuniaun plenária estraordinária iha aban trata ida-ne’e”, nia hato’o.
Relembra katak, iha loron 07 Maiu, Ministra Edukasaun, Dulce de Jesus Soares, aprezenta iha Konsellu Ministru proposta alterasaun kona-ba projetu Lei Baze Edukasaun foun, ne’ebé elabora husi Komisaun G.
Ministra esplika katak revizaun ba enkuadramentu legál setór ne’e ho objetivu atu garante koerénsia normativa ne’ebé boot liu, tuir diploma sira ne’ebé aprova ona, ne’ebé regula nivel oioin ensinu nian.
Lei ida-ne’e mai ho objetivu atu promove edukasaun inkluziva no ekuitativa, valoriza formasaun no progresaun ba karreira dosente, adapta lejizlasaun ho realidade lokál no hametin kompromisu Estadu nian ba edukasaun ne’ebé iha kualidade ba ema hotu.
Aleinde ne’e, atualiza ba terminolojia ne’ebé daudaun la uza, atu asegura aliñamentu ho preseitu pedagójiku modernu sira ne’ebé konsagra ona iha lejizlasaun atuál.
Notísia relevante: ME aprezenta alterasaun Lei Baze Edukasaun foun iha Konsellu Ministru
Jornalista: Nelson de Sousa
Editora: Maria Auxiliadora
