LIKISÁ, 13 Maiu 2025 (TATOLI) – Ministériu Transporte no Komunikasaun, liuhusi Autoridade Portuária Dili (APORTIL) disponibiliza kontentór rua ba Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) hodi rai sasán apreendidu, ne’ebé liu prazu, nomós rai ekipamentu AIFAESA nian.
Inspetora-Jerál AIFAESA, Odete Viegas, hateten AIFAESA planeia atu sosa kontentór mamuk rua, maibé la konsege sosa tanba halo fali pedidu ba MTK no hatún despaixu ba APORTIL hodi fó kontentór ba AIFAESA.
“Kontentór rua ne’e, ami uza ba [tau] sasán sira ne’ebé apreende no ida fali ami bele rai sasán AIFAESA nian”, Odete Viegas dehan ba Tatoli, iha Tíbar, ohin.
Lembra katak, antes ne’e antigun Inspetór-Jerál AIFAESA, Ernesto Monteiro, hateten institutu presiza sosa kontentór, nune’e bainhira sira halo apreensaun ba sasán liu prazu sira, molok halo destruisaun tenke rai iha kontentór laran.
Tanba, durante ne’e, fatin tau sasán sira laiha, nune’e AIFAESA tau de’it iha eskritóriu ida no espasu la sufisiente ona.
“Kona-ba atu sosa kontentór akumula sasán apreensaun nian. Daudaun ne’e prosesa ona iha Komisaun Nasionál Aprovizionamentu. Ne’ebé prosesu ne’e hotu ita sei sosa kontentór”, Ernesto Monteiro hateten foin lalais ne’e.
Notísia relevante: Planu tinan ne’e, AIFAESA,I.P sei sosa kontentór akumula sasán apreensaun
Jornalista: Arminda Fonseca
Editora: Maria Auxiliadora
