DILI, 16 marsu 2023 (TATOLI)— Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), iha ona planu tinan ne’e, sei sosa kontentór hodi bele akumula sasán apreensaun ne’ebe liu ona prazu.
Inspetór Jerál AIFAESA,I.P, Ernesto Monteiro, hateten, AIFAESA,I.P presiza sosa kontentór, nune’e bainhira sira halo apreensaun ba sasán liu prazu sira molok halo destruisaun tenke rai iha kontentór laran. Tanba, durante ne’e, fatin tau sasán sira laiha, ho nune’e AIFAESA foti tau de’it iha eskritóriu ida no espasu la sufisiente ona.
“Kona-ba atu sosa kontentór akumula sasán apreensaun nia daudaun ne’e prosesu ona iha Komisaun Nasional Aprovizionamentu (CNA). Ne’ebé prosesu ne’e hotu ita sei sosa kontentór,” Inspetór Jerál, AIFAESA,I.P, Ernesto Monteiro hateten ba Agência Tatoli, iha Embaixada Repúblika Indonézia (KBRI), kinta ne’e.
Notisia relevante : AIFAESA planeia sosa kontentór akumula sasán apreensaun
Nia dehan, prosesu atu sosa kontentór foun maibé iha Timor-Leste merkadu faan kontentór foun laiha. Ho ida ne’e, sei haree atu sosa iha rai liur ka sosa de’it mak kontentór sira ne’ebé uzadu ona.
“Ida ne’e ita sei haree, no tuir planu ita hakarak sosa kontentór rua maibé depende de’it ba folin no medida tanba osan ne’ebé agora ita prevee atu sosa ne’e hamutuk $7.000. Ne’ebé osan ne’e to’o ita bele sosa rua sei lae sosa ida ho ninia feet 20, ne’e mós sufisiente ona,” Ernesto hateten.
Jornalista : Arminda Fonseca
Editora : Armandina Moniz
