EKONOMIA, HEADLINE

AIFAESA planeia sosa kontentór akumula sasán apreensaun

AIFAESA planeia sosa kontentór akumula sasán apreensaun

Inspetór Jerál AIFAESA, I.P, Ernesto Monteiro. Imajen Tatoli/Antónia Gusmão

DILI, 27 juñu 2022 (TATOLI)—Autoridade Inspesaun no Fiskalizasaun Atividade Ekonómika, Alimentár no Sanitária, Institutu Públiku (AIFAESA, I.P) planeia sosa kontentór hodi tau-hamutuk sasán ne’ebé parte AIFAESA apreende, liuliu sasán liu prazu sira molok halo destruisaun.

“Kona-ba estabelese armazen ne’e iha duni planu iha tinan ne’e, maibé orsamentu inklui servisu deskonsentradu sira no orsamentu la pasa iha Parlamentu Nasionál, ho nune’e ha’u iha hanoin ida katak bele sosa de’it kontentór tanba presu ladún boot,” Inspetór Jerál AIFAESA, I.P, Ernesto Monteiro, informa ba Agência Tatoli, iha ninia knaar fatin, Matadoru, segunda ne’e.

Notísia relevante: AIFAESA identifika empreza inklui na’an tasak iha produtu Cesta Bázika

Nia dehan, provizóriumente fatin tau sasán sira ne’ebé AIFAESA foti tau de’it iha eskritóriu no haree ba espasu la sufisiente.

“Bainhira sasán sira ne’e tau hamutuk fali ho ema (funsionáriu) sira ne’ebé serbisu, aleinde ema, sasán mós iha sorin ne’e ninia iis dois afeta tebes, iha parte ida ami kontrola hela ijiene maibé ami rasik laiha ijiene,” nia preokupa.

Tanba ne’e, bainhira planu ne’e la konsege realiza iha tinan 2022 mak sei prevee orsamentu ba tinan 2023.

AIFAESA iha kompeténsia atu halo inspensaun no fiskalizasaun, katak produtu sira ne’ebé iha di’ak ba saúde umana, fó instrusaun no determina koima bainhira empreza komete infrasaun tuir Dekretu-Lei númeru 26/2016, loron 29 juñu 2016.

Vizaun institutu ne’e maka hanesan entidade referénsia ida ba protesaun konsumidór, defeza ba saúde no promosaun ba konkorénsia leál entre operadór ekonómiku.

Ho misaun importante ne’e mak halo avaliasaun kona-ba risku iha kadeia alimetár no asegura komunikasaun no divulgasaun públika no transparante ba konsumidór sira, halo inspesaun no fiskalizasaun no prevensaun ba kumprimentu lejizlasaun ne’ebé regula ezersísiu kona-ba atividade ekonómiku sira iha setór alimentár no la’ós alimentár.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!