DILI, 13 Maiu 2025 (TATOLI) – Papa Leão XIV defende libertasaun jornalista sira ne’ebé detidu iha mundu tomak “tanba buka no relata lia-loos”.
Leão XIV hato’o iha enkontru ho profisionál komunikasaun sosiál husi nasaun oioin, iha sala Paulo VI, iha Vatikanu, segunda ne’e.
Iha sorumutu ho imprensa mundiál, Papa agradese ba serbisu jornalista nian durante funerál Papa Francisco to’o Konklave, no realsa papél komunikasaun ba divulga lia-loos no pás nian.
“Ha’u agradese ba serbisu ne’ebé imi halo no kontinua halo iha tempu ne’e, ne’ebé ba Igreja, mak tempu grasa nia”, Leão XIV hato’o, ne’ebé Tatoli sita husi Vatican News.
Iha nia diskursu Papa destaka importánsia husi komunikasaun nian ba servisu lia-loos no nia hato’o solidariedade Igreja nian ba jornalista sira ne’ebé prezu tan buka verdade.
“Igreja rekoñese testemuña sira ne’e, liuliu sira ne’ebé relata funu maski ho risku ba própria vida, sira ne’ebé iha korajen atu defende dignidade, justisa, direitu povu nian ba informasaun. Tanba só ema ne’ebé informadu mak bele halo eskolla livre. Sofrimentu jornalista prezu sira dezafia konxiénsia nasaun no komunidade internasionál, bolu ita hotu atu salavaguarda liberdade espresaun no imprensa”, dehan.
Papa husu jornalista sira atu promove tipu komunikasaun ho forma diferente, “ne’ebé la buka konsensu ho maneira hotu, la uza liafuan agresivu, la simu kultura kompetisaun, no la separa buka verdade ho domin ne’ebé loloos buka ho umilde”.
Nia dehan forma komunikasaun ne’e importante tebes. “Ita tenke dehan la’e ba funu liafuan no imajen, ita tenke rejeita paradigma funu nian”, salienta.
Papa mós ko’alia kona-ba evolusaun teknolójika, liuliu intelijénsia artifisiál ne’ebé nia hateten antes ona iha enkontru formál ho kardeál sira, iha sábadu foin lalais ne’e, katak reprezenta dezafiu boot, ne’ebé “ezije responsabilidade no dixernimentu atu oriente instrumentu ba ema hotu nia di’ak, atu fó benefísiu ba umanidade”.
Notísia relevante: Luta hasoru problema sosiál iha revolusaun dijitál sai razaun Papa eskolla Leão XIV
TATOLI
