Autoridade Vikeke dezafia funsionáriu PNDS servisu profisionál
VIKEKE, 14 Maiu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soares, dezafia funisonáriu Progama Dezenvolvimentu Nasionál (PNDS) tenke servisu ho profisionál iha baze.
“Prezensa PNDS polítika Governu nian hakarak hakbesik povu iha área remota sira. Maibé, durante tinan 10 ne’e ita haree implementasaun balun di’ak, balun la’o ladun di’ak tanba falta ita-nia kontrolu. Tan ne’e, ha’u husu funsionáriu PNDS sira-ne’ebé koloka kada postu sira servisu ho profisonál no tenke kontrolu ba ezekusaun obra sira-ne’ebé implementa iha aldeia no suku sira,” PAM Vikeke ne’e hateten iha nia diskursu iha iha abertura formasaun ba funsionáriu PNDS sira, iha salaun postu Vikeke Vila, ohin.
Ba funsionáriu sira tantu kazuál, ajente no permanete mak nu’udár ajente Governu nian hodi tau matan no kontrolu ba projetu sira-ne’ebé implementa iha baze.
“Liuhusi formasaun sira-ne’e, ha’u husu funsionáriu PNDS sira tenke esplora ho di’ak, hodi ajuda ita-nia knaar atendementu iha tereinu. Atu responde servisu sira-ne’ebé prioridade ba Governu nian. Bainhira servisu ladi’ak, ami mós sei hapara kontratu sira tanba ita-boot sira-nia presenza ne’e atu reforsa servisu sira,” nia dehan.
Diretór Servisu PNDS munisípiu Vikeke, Francisco Soares Varela, haktuir formasaun ba funsionáriu sira PNDS hodi hasa’e sira-nia koñesementu ba akuntablidade, aprovizionamentu no tékniku sira iha baze implementasaun.
“Tan ne’e, ita hahú formasaun nivél munisípiu ba funisionáriusira iha postu lima, atu sira bele hatene papel no matadalan PNDS nian. Programa PNDS ita sei hahú implementa iha fulan-Juñu nune’e liuhusi formasaun sira-ne’e bele ajuda ona ita-nia funsionáriu sira liuliu ba prosesu aprovizionamentu, hodi implementa karik labele hetan presaun ruma husi ita-nia autoridade suku sira,” nia hateten.
Tuir dadus programa PNDS ba tinan 2024 nian ne’e iha totál projetu hamutuk 41 ho totál orsamentu $1,585,750. Husi projetu 41 dadauk ne’e atinje ba 75 no projetu ba tinan 2025 projetu hamtuuk 40 ho totál orsamentu $1,491,92,57 ne’ebé iha faze preaprasaun implementasaun.
Iha formasaun ne’e oferese husi Ajénsia PARTISIPA no PNDS munisípiu durante loron tolu (3) no hetan partisipa husi PNDS postu lima no munisípiu hamutuk na’in-43.
Jornalista : Vitorino Lopes da Costa
Editór : Cancio Ximenes
