OEKUSI, 14 Maiu 2025 (TATOLI) – Comisaun Anti Corrupsaun (CAC), kuarta ohin, hala’o sensibilizasaun lei númeru 7/2020 kona-ba Medida Prevensaun Kombate Korrupsaun (MPCC) hodi hasa’e koñesimentu ba ajente públiku no setór sira iha Rejiaun Administrativa Espesiál Oekusi Ambeno (RAEOA).
“Sosializasaun ohin ne’e, ita hamutuk ho Autoridade RAEOA, kargu xefia no setór privadu sira, nune’e sira bele hatene didi’ak kona-ba implementasaun lei númeru 7/2020 ne’e, tanba lei ne’e mós envolve setór privadu, sei sira abandona projetu ruma ka halo projetu laiha kualidade, sira bele hetan prosesu kriminál, tan ne’e ita mai dezamina, atu sira iha koñesimentu kona lei ne’e,” Komisáriu CAC, Rui dos Santos Pereira, dehan iha otél Ambeno, ohin.
Notísia relevante:Membru PN husu CAC tau-atensaun ba kazu korrupsaun ne’ebé fó prejuizu boot
Biban ne’e, parte CAC oferese hela livru ba Autoridade RAEOA no kargu xefia sira, nu’udar matadalan atu kumpre no banati tuir.
“Ohin, ami fó livru ba sira, atu apoia sira, no Autoridade RAEOA bele kontinua partilla tutan ba kargu xefia sira, emprezáriu sira, nune’e iha sorumutu ruma sira bele halo diskusaun kona-ba lei númeru 7/2020 nia objetivu sira-ne’ebé regula sasán sira iha livru laran ne’e,” nia fó hanoin.
Iha biban hanesan, Sekretáriu Rejionál ba Asuntu Administrasaun, Andre Lao, reprezenta Prezidente Autoridade RAEOA, agradese tanba liuhusi introdusaun lei Medida Prevensaun Kombate Korupsaun, bele eleva koñesimentu ba setót privadu no kargu xefia sira iha Oekusi.
“Ami agradese tanba prezensa CAC bele tulun ami atu hatene, lei MPCC ne’e, tanba ita asumu kargu xefia ne’e responsabilidade rai no povu, nune’e mós ba setór privadu nu’udar parseriu dezenvolvimentu, entaun ohin ita haree barak mak partisipa, atu rona direita, nune’e futuru implementa projetu karik bele kumpre, no liuliu ma kami hanesan funsionáriu makaer xefia sira, tenki kuidadu jere osan povu ho didi’ak,” nia orgullu.
Lei Medida Prevensaun no Kombate Korrupsaun (MPCC, sigla portugés) ho artigu hamutuk 117, tama ein vigór no kompleta ona loron 180, iha loron 22 fevereiru 2021, mak ekipa husi CAC hahú halo diseminasaun ba ajente públiku liuliu kargu xefia sira.
Lei MPCC iha artigu 29 to’o 30 ne’e fó obrigatóriu ba iha ajente públiku sira-neʼebé kaer hela kargu polítiku no kargu xefia iha funsaun públika iha instituisaun Estadu, diretór nasionál to’o mai xefe departamentu iha obrigasaun atu bele aprezenta sira-nia deklarasaun bens no interrese.
Funsionáriu Estadu ne’ebé asume kargu xefia sei deklara sira-nia rikusoin inklui sira-nia família ba CAC bainhira lei ne’e hahú implementa.
Iha kapítulu II Rejime Deklarasaun Bens no Interese, artigu 28 obriga kualkér sidadaun ne’ebé asume karu públiku tenke deklara rikusoin.
Natureza husi artigu ne’e ko’alia kona-ba ema sira-neʼebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu no funsionáriu sira neʼebé la’ós okupa kargu xefia maibé pertense ba área sira konsidera altu risku ba korrupsaun.
Nune’e mós, ba funsionáriu sira-neʼebé iha área serbisu hanesan impostu, aprovizionamentu ba kontratu públiku, jestaun rai ho inspesaun tenke halo deklarasaun.
Notísia relevante:CAC rekolla koima $93.321,87 husi infratór aprezenta deklarasaun rikusoin tarde
Jornalista: Abílio Elo Nini
Editór : Florencio Miranda Ximenes
