Kondisaun Padre Domingos Maubere iha mudansa
DILI, 14 Maiu 2025 (TATOLI)—Kondisaun Pároku Parókia Sagrado Coração de Jesus Bekora, Pe. Domingos Maubere, agora daudaun iha mudansa ona kompara ho loron hirak liubá.
“Relasiona ho Padre Domingos Maubere nia kondisaun ne’e, iha ona mudansa kompara ho loron hirak liubá, tanba horikalan nia (Padre Domingos) komesa loke matan ona. Maski nune’e, ninia kondisaun jerál nafatin krítiku,” Diretór Servisu Apoiu Diagnóstiku Terapéutiku iha Hospital Nacional Guido Valadares (HNGV), Vidal de Jesus Lopes, dehan ba jornalista sira, iha nia kna’ar fatin, HNGV, Bidau, kuarta ne’e.
Nia hateten, Padre Domingos baixa iha HNGV durante loron neen ona, maibé iha Intensive Care Unit (ICU) nia baixa loron tolu. Nia kondisaun nafatin krítiku, maibé kondisaun klínika kompara ho loron anteriór komesa iha ona mudansa uitoan ona tanba nia loke ona matan, Glasgow Coma Scale (GCS) tun bá tolu, agora sa’e ona bá hitu (7), atu sukat nia nível konxiénsia maibé nafatin ho ventiladór, signifika katak nia kondisaun iha faze krítiku nafatin.
“Daudaun ne’e, Padre nia valór normál sa’e ona ba 15, kompara ho loron rua liubá tun ba valór tolu no hosi valór ne’e atu evalua kona-ba klínika pasiente nian. Tanba kada loron médiku sira nafatin akompaña no halo intervensaun ba nia tratamentu saúde. Husi evaluasaun ne’e ita atu hatene nia loke matan ka lae, nia tenta atu ko’alia ka lae, nia book-aan ka lae. Atu haree ida-ne’e. Nia valór ne’e kada pontu iha, maibé nia kondisaun nafatin krítiku. Depende ba nia evaluasaun klínika, tanba kada loron ekipa médika akompaña no halo intervensaun ba tratamentu tuir nia moras,” Vidal haktuir.
Notísia relevante: Dom Virgílio husu sarani sira kontinua reza ba Padre Domingos Maubere
Aleinde ne’e, Lopes dehan, vizita husi sarani sira bá iha sala ICU ne’e reduzidu ona tanba kuidadu intensivu ne’e iha pesoal saúde sira, nune’e família sira labele hein permanente pasiente iha sala ICU.
Jornalista: Felicidade Ximenes
Editór: Xisto Freitas da Piedade
