VIKEKE, 14 Maiu 2025 (TATOLI)—Ekipa Servisu Sáude munisípiu Vikeke entrega ofisiál kuadru indikasaun kona-ba xave programa saúde nian ba Prezidente Autoridade Munisípiu Vikeke hodi akompaña progresu servisu sira-ne’ebé implementa iha postu saúde no sentru saúde sira iha munisípiu Vikeke.
Diretór Servisu Saúde munisípiu Vikeke, Aljacsono S. Maia, hateten indikasaun xave ne’e Servisu Saúde munisípiu Vikeke entrega ba PAM hodi taka iha munisípiu atu autoridade sira bele hatene programa prioridade sira-ne’ebé saúde implementa.
“Tanba ne’e, ami mai entrega hela kuadru ne’e ba PAM no kada trimetre ami-nia ekipa sei mai prienxe atinjimentu sira iha kuadru referida. Atu ita-nia atutoridade bele hatene ita-nia atinjimentu sira-ne’ebé ami implementa iha baze,” Aljacsono S. Maia hateten ba Agência TATOLI, iha sala PAM Vikeke, ohin.
Nia esplika, kartaun progresu Servisu Munisipál Saúde indikasaun xave husi monitorizsaun no avaliasaun sira ba indikadór sira-ne’ebé implementa.
Iha indikadór hamutuk neen (6) mak hanesan númeru suku ne’ebé implementa atividade monitorizasaun ho baze komunitária ba saúde, ida-ne’ebé deside ona atu hala’o screening tama no sai ba moras infesiozu sira, fasilidade saúde nee’ebé la hetan estoke mamuk ba vasina, medikamentu kategória esensiál, fasilidade saúde ne’ebé entrega relatóriu tuir tempu no fasilidade saúde ne’ebé entrega relatóriu kompletu.
“Nune’e ba indikadór neen kada trimestre servisu saúde sei prienxe hodi ita-nia autoridade bele apar servisu sira-ne’ebé saúde halo. Ita mós sei implementa suku saudavél ka suku ijeniku ne’ebé sei implementa iha suku 38 iha munisípiu Vikeke, espera tinan oin ne’e ita bele implementa,” nia klarfika.
Tan ne’e, nia dehan, ba kuadru ne’e kada trimestre finaliza relatóriu ekipa saúde sira sei mai hodi prienxe iha tabela ba atinjimentu sira.
Enkuantu Kuadru indiksaun xave ne’e diretór saúde Vikeke entrega direta ba PAM hodi taka iha sala vizita autoridade Vikeke.
Hafoin simu indikasaun xave ne’e, Prezidente Autoridade Munisípiu (PAM) Vikeke, Francisco C.S de G. Soares, hateten indikasaun xave ne’e sei orienta gabinete hodi taka iha sala atu bele haree progresu servisu sira-ne’ebé saúde implementa iha munisípiu Vikeke.
“Ida-ne’e di’ak, ita bele tau iha ne’e. atu ita bele hatene programa saúde nian ne’ebé implementa iha fasilidade saúde sira,” nia dehan.
Iha serimónia entrega kuadru xave ne’e diretór saúde munisípiu Vikeke no hetan akompaña husi funsionáriu saúde no gabinete husi PAM Vikeke.
Jornalista : Vitorino Lopes da Costa
Editór : Cancio Ximenes
