DILI, 15 Maiu 2025 (TATOLI) – Komisaun G Parlamentu Nasionál (PN) ne’ebé trata Asuntu Edukasaun, Juventude, Kultura no Sidadania, hahú iha 21 Maiu audiénsia públika ba Projetu Lei númeru 8/VI(2a)-Aprova Lei Baze Edukasaun Pré-Eskolár, Ensinu Báziku no Sekundáriu.
“Ami tau ona iha 21 Maiu hahú audénsia públika ba Projetu Lei ne’e”, Prezidente Komisaun G, Armando dos Santos, informa ba Tatoli iha PN, ohin.
Tuir planu, Komisaun sei bolu Ministériu Edukasaun, Ministériu Administrasaun Estatál (MAE), manorin-na’in, sosiedade sívil no entidade relevante sira seluk atu rona sira-nia hanoin ba projetu lei referidu.
Prezidente Komisaun ne’e seidauk esplika detallu kona-ba razaun no konteúdu aprezenta projetu lei ne’ebé mai husi inisiativa deputadu sira-nia.
Rekorde katak, iha 13 Maiu 2025, Meza PN liuhusi reuniaun plenária halo anúnsiu admisaun no baixa ba Komisaun G ba Projetu Lei númeru 8/VI (2a) hodi halo apresiasaun inisiál atu fó relatóriu no paresér hafoin diskusaun jeneralidade, espesialidade no finál globál.
Lei Baze Edukasaun mai ho objetivu atu promove edukasaun inkluziva no ekuitativa, valoriza formasaun no progresaun ba karreira dosente, adapta lejizlasaun ho realidade lokál no hametin kompromisu Estadu nian ba edukasaun ne’ebé iha kualidade ba ema hotu.
Aleinde ne’e, atualiza ba terminolojia ne’ebé daudaun la uza, atu asegura aliñamentu ho preseitu pedagójiku modernu sira ne’ebé konsagra ona iha lejizlasaun atuál.
Notísia relevante: Meza PN baixa Projetu Lei Baze Edukasaun ba Komisaun G
Jornalista: Nelson de Sousa
Editora: Maria Auxiliadora
