BOBONARU, 15 Maiu 2025 (TATOLI)—Eletrisidade Timor-Leste, Empreza Públika (EDTL, E.P) Munisípiu Bobonaru, lideradu Mário de Jesus Soares, ameasa hakotu liña eletrisidade ba suku Raiheu, Genulai, Goulo no Atudara, postu administrativu Kailaku ho totál uma ka’in kuaze 1,000-resin, tanba dezde asesu enerjía elétrika iha tinan kotuk to’o agora seidauk kumpre dever selu taxa ba Estadu.
Notísia Relevante: EDTL ameasa hakotu liña eletrisidade ba uma-kain 400 resin
Jestór RDTL, E.P Munisípiu Bobonaru, Mário de Jesus, haktuir iha kuarta 14 Maiu 2025) horisehik, nia parte halo ona enkontru ho autoridade postu no líder komunitária sira atu partilla informasaun ba komunidade benifisiáriu sira hakbesik-aan mai rejistu iha edifisíu EDTL, E.P Maliana hodi sai kliente legál.
Mário dehan, EDTL E.P sei fó tempu semana rua tan, fó prazu to’o loron 31 fulan-Maiu 2025 no bainhira la kumpre mak Governu liuhusi Eletrisidade Timor-Leste, Empreza Públika (EDTL, E.P) sei aplika zero toleránsia.
“Ita atu jere kontadór iha suku Raiheu, Genulai, Goulolo no Atudara, liuhusi prosesu ida, sira tenke mai rejistu, selu tuir kategoria. Agora, ha’u sei fó tempu semana rua. Se ida-ne’e mak kliente sira lakohi koopera, lakoh’i selu taxa ba Estadu mak EDTL obrigatóriu sei hakotu enerjía katak suku ida-ne’e lalika uza ahi, tanba EDTL, E.P fó ona uza gratuita fulan neen (6),” Nia imforma ba Agência Tatoli iha nia kna’ar fatin, kinta ne’e
Jestór ne’e hatutan, komunidade presiza hateten katak utilizasaun gratuita validu de’it ba fulan neen (6) no liuhusi ne’e tenke mai rejistu liuhusi selu taxa ho kategoria kliente doméstiku selu $36 kada uma kain no kategoria Komérsiu $73, nune’e EDTL, E.P bele jere kontadór.
Mário klarifika bainhira kliente sira la selu taxa sei fó despeza ba Estadu.
“Ita nia estádu ezije ba EDTL, E.P iha tinan ne’e hatama reseita rihun $60-resin, entaun ita foti liuhusi ne’ebé, liuhusi buat sira-ne’e. Se uza enerjia elétrika ka ahi gratuita hanesan bee ida karik ita fakar loos de’it, tanba sira dehan la selu ona bee loron mós la-taka ahi no kalan nafatin. Ida-ne’e ita fó todan ba sentrál elétrika rua. se ita jere ona kontadór ema hotu uza ona ahi ho dixiplina tuir nesesidade tanba liga ho osan,” nia dehan.
Entretantu, Xefe suku Raiheu, Ventura Maria Tai, hateten komunidade suku Raiheu rejeita atu ba rejistu tanba instalasaun enerjía elétrika liuhusi projetu Eletrifikasaun Nasionál (PEN) ne’ebé kompañia Apaser Unipesoál, Lda, halo iha tinan kotuk seidauk kobre metade uma kain iha aldeia Oho-Ana.
“Presiza sira halo kompletu lai mak foin ba rejistu. Karik la bá halo kompletu sira la ba rejistu,” nia informa Agência ba Tatoli liuhusi WhatsApp.
Enkuantu tuir dadus ne’ebé Tatoli asesu totál kliente Munisípiu Bobonaru ne’ebé daudaun ne’e selu taxa ba Estádu hamutuk rihun $18.
Notísia Relevante: EDTL Bobonaru deside kansela hakotu liña eletrisidade ba suku Saburai-aldeia Atus
Jornalista : Sergio da Cruz
Editór : Cancio Ximenes
