DILI, 15 Maiu 2025 (TATOLI)—Diretór Nasionál Servisu Prizionál no Reinsersaun Sosiál, Delfio Soares Alves, hateten ekipa téknika husi Diresaun Terra no Propriedade Ministériu Justisa, Ministériu Solidariedade Sosiál (MSSI) no Sekretária Estadu Formasaun Profisionál no Empregu (SEFOPE) sei diskute terrenu (rai) ba instalasaun Sentru Juvenil ne’ebé lokalizadu iha Suku Tibar, Postu Administrativu Bazartete, Munisípiu Likisá.
“Ohin asina ona karta konvokatória. Sei konvida MSSI, Diresaun Jerál SEFOPE nian iha Tibar, Kadastru, Terra no Propriedade no Diresaun Jerál Polítika Justisa, Diresaun Servisu Prizaun, atu halo reuniaun hodi esplika kona-ba progresu oinsá halo koordenasaun ho Ajénsia Dezenvolvimentu Nasionál (AND), kona-ba rai ne’ebé atu harii Sentru Juvenil,” Delfio hateten ba TATOLI iha nia kna’ar fatin, Kaikoli, kinta ne’e.
Notísia relevante: MJ prevee rihun $350-resin ba dezeñu Sentru Juvenil
Nia dehan diskusaun liña minsteriál atu hahú daudaun nune’e kuandu loos hotu ona mak foin hetan títulu (sertifikadu) na’in ba rai ba instalasaun Sentru Juvenil.
“Kuandu hetan ona títulu na’in ba rai mak foin fó ba iha Ajénsia Dezenvolvimentu Nasionál atu prosesa bá Komisaun Nasionál Aprovizionamentu atu halo fali konkursu ba konstrusaun Sentru Juvenil,” nia haktuir.
Delfio haktuir, dezeñu ba Sentru Juvenil ne’e konkluidu ona. “Dezeñu no Bill of Quantities (BOQ) ba Sentru Juvenil iha ona dezde tinan 2014 liubá, maibé dinámika polítika ne’ebé iha atraza tiha prosesu referidu,” nia tenik.
Jornalista: Natalino Costa
Editór: Xisto Freitas da Piedade
