Primeiru interrogatóriu kazu rasta faru Padre David adia ba semana oin
BAUKAU, 14 Maiu 2025 (TATOLI)–Tribunál Distritál Baukau (TDB), kuarta ne’e, deside primeiru interrogatóriu kazu rasta faru Padre David Savio, SDB, adia ba semana oin.
Kazu referidu akontese iha Igreja Parókia Santa Terezinha Kelikai rejista iha Ministériu Públiku (MP) ho Nuc. 0015/25.BCQLC TDB deside halo adiamentu tanba lezadu Padre David Savio la marka prezensa.
“Atu halo Primeiru interrogatóriu, maibé lezadu la marka prezensa entaun Tribunal adia fali ba 21 Maiu tinan ne’e tuku rua lororaik,” Defensora Agostinha de Oliveira hateten iha TDB Vila Nova, Baukau.
Notísia relevante: Kazu rasta faru padre hein prosesu iha Ministériu Públiku
Defensora Agostinha konsidera kazu referida nu’udár krime semi públiku, nune’e desizaun hotu konforme lezada hanesan kontinua prosesa ka bele kansela no hamosu konkordánsia entre parte rua.
Kazu ne’ebé komete husi suspeitu mane ho inisiál SdC idade 34 suspetadu ba ameasa no rasta vítima hodi rezulta kamiza nakles hafoin mosu dezentendimentu relasiona ho prosesu trata sertidaun batizmu.
“Karik lezadu hakarak dada fali kazu ne’e entaun lejitimidade tomak iha lezadu nia liman,” Agostinha de Oliveira dehan.
Entretantu, prosesu primeiru interrogatóriu kazu referidu prezide husi juíza Maria Solana, Ministériu Públiku reprezenta husi Bartolomeu Dias no suspeitu SdC hetan asisténsia husi Defensora Públika, Agostinha de Oliveira.
Jornalista: Natalino Belo
Editór: Xisto Freitas da Piedade
