PDHJ sei husu fiskalizasaun abstrata ba alterasaun Lei Organizasaun Judisiária
DILI, 14 Maiu 2025 (TATOLI)—Provedor dos Direitos Humanos e Justiça, Virgílio da Silva Guterres, hateten Provedoria dos Direitos Humanos e Justiça (PDHJ) sei submete pedidu ida ba Tribunál Rekursu (TR) atu husu fiskalizasaun abstrata ba alterasaun Lei Organizasaun Judisiária.
PDHJ sei husu fiskalizasaun liuliu ba artigu 76A alínea 2 ne’ebé fó kompeténsia ba Prezidente Repúblika hodi nomea Prezidente Tribunál Rekursu no artigu 124 alínea 3 Konstituisaun RDTL ne’ebé sai baze ba nomeasaun.
Nia dehan agora daudaun parte legál hosi Provedoria analiza hela seráke lei ne’e kontra espíritu Konstituisaun ka lae.
“Agora sira analiza hela, atu verifika dehan lei ne’e kontradis ho prinsípiu Konstituisaun ka lae. Se kontradis, tenke halo fiskalizasaun,” Virgílio hateten ba TATOLI bainhira partisipa aniversária Polísia Sientífika Investigasaun Kriminál (PCIC-sigla portugés) iha Bebora, kuarta ne’e.
Notísia relevante: Bankada opozisaun submete alterasaun Lei Organizasaun Judisiária ba TR atu halo Fiskalizasaun Abstrata
Nia dehan, maizumenus semana tolu hanesan ne’e PDHJ sei submete pedidu ba Tribunál Rekursu atu halo fiskalizasaun ba alterasaun lei referida.
Jornalista: Natalino Costa
Editór: Xisto Freitas da Piedade
