DILI, 15 Maiu 2025 (TATOLI) –Akontesimentu rai-nakdoko (terramotu) iha ohin ne’e klasifika ba eskala intensidade (2-4), magnitude 5.8, no ninia profundidade ka kle’an ne’e iha 460 Km konsidera moderadu no sei laiha poténsia ba tsunami (tasi-sa’e), Institutu Jeosiénsia Timor-Leste (IGTL, sigla portugés) konfirma.
Prezidente IGTL, Job Brites dos Santos hateten, akontesimentu rai-nakdoko ne’e ohin ita hotu-hotu sente iha tuku 09:50 dadeer no tuir sira-nia estasaun sizmometru akapta kedas lokalizasaun rai-nakdoko ne’e iha parte Norte Wetar husi Illa Timor (Banda Sea).
“Ema hotu hatene katak kauza husi rai-nakdoko ne’e tanba akontesimentu plaka rua soke malu no ami bele dehan impaktu ba tasi sa’e (tsunami) ne’e laiha”, Prezidente ne’e esplika ba jornalista TATOLI, iha edifísiu IGTL Manleuana, Dili, ohin
Rai-nakdoko ohin ne’e ninia magnitude ki’ik, no ninia intensidade ne’e konsidera fraku ka moderadu hela atu fó influénsia ne’ebé maka’as.
“Nune’e husi IGT ami haree monitorizasaun ba mudansa husi terramotu ne’e tanba dalaruma bele fó ameasa ba ema nia vida no infraestrutura sira-ne’ebé sensitivu (gampang runtuh) entaun ami haree ba importánsia buat sira-ne’e hodi asegura”, nia informa.
Enkuantu daudaun ne’e IGT instala ona sismográfu 13 iha territóriu nasionál para bele kontrola atividade sísmiku. Parte estasaun sira-ne’e detekta hodi manda lalais kedas ba iha IGTL nasionál.
“Husi ami-nia estasaun sira-ne’e ami konsege halo mapa ida sisme zone lab atu bele hatene katak atividade rai-nakdoko ne’e maka’as liu iha ne’ebé, no bele detekta direta maske dook husi Illa Timor”, nia hateten.
Prezidente IGTL, Job Brites dos Santos énfaze, tanba intensidade ne’e hahú husi 1 to’o 10 entaun rai-nakdoko ida ohin ne’e iha de’it 5.8 katak ne’e moderadu no laiha poténsia atu kria tsunami no rai-halai; ne’e laiha.
Entaun rai-nakdoko ne’e normál. Ne’e prosesu natureza ida iha siénsia jeolójia bolu dehan prosesu tektónika ne’e sempre iha mudansa nune’e hodi akontese terramotu ne’e tanba ne’e komunidade sira labele pániku nafatin akompaña informasaun IGTL ninia pájina atu hatene kle’an kona-ba jeolojia.
Jornalista: Alexandra da Costa
Editór: Rafael Ximenes de A. Belo
