Xefe Estadu halo uma dignu ba inan faluk ida iha Oekusi

OEKUSI, 15 Maiu 2025 (TATOLI) – Ekipa husi Gabinete Prezidente Repúblika liuhusi Fundu Sosiedade Sivíl ba Asuntu Sosiál, akompaña husi Asesór Prezidente Autoridade Rejiaun Administrativa Espesiál Oekusi Ambeno (RAEOA), kuarta ne’e, halo lansamentu hatuur fatuk dahuluk ba uma dignu, ne’ebé apoia husi Prezidente Repúblika (PR), José Ramos Horta, ba inan-faluk ho naran Balbina Beno, iha suku Bobokase, sub-rejiaun Pante Makasar.

Reprezentante Asesór Sosiedade Sivil  ba Asuntu Sosiál iha Gabinete Prezidente Repúblika, Mouzinho Exposto de Fátima, esplika uma dignu ne’e ho nia medida 7×8, kompleta kedas ho kuarta tolu, hariis fatin no koziña.

Notísia relevante:PR Horta entrega uma ba família vulneravél iha Uma Uain Kraik

“Uma ne’e harii tanba proposta mai husi autoridade lokál Bobokase hato’o ba Prezidente Repúblika no hetan aprovasaun entaun asesór orienta ekipa ida mai halo lansamentu ne’ebé materiál agora mobiliza ona iha ne’e, hanesan rai henek, fatuk, besi beton no materiál seluk, atu hahú konstrui ona,” nia informa iha ámbitu lansamentu ne’e.

Uma referidu nia durasaun servisu fulan-tolu, ho nia totál orsamentu gastu seidauk hatene loloos, bainhira obra ne’e konklui sei informa ba públiku tanba sei inaugura direita husi Prezidente Repúblika, José Ramos Horta.

Iha fatin hanesan, Xefe suku Bobokase, Tomas Nessi, informa katak iha tinan 2024 inan faluk ne’e, hetan dezastre naturál iha tempu udan no anin bo’ot estraga tiha nia uma no laiha fatin dignu ba nia atuhela ho seguru, nune’e autoridade lokál sira hato’o proposta direita ba Prezidente Repúblika atu tau atensaun.

“Ami agradese tanba proposta ne’e maske kle’ur ona, maibé bele aprova atu harii netik fatin dignu ba inan faluk ne’e atu hela ho seguru no hakmatek, tanba nia hela fatin la dignu atu satan udan been, depois kondisaun kbi’it la’ek iha oan feto ida maibé forma ona família no hela do’ok husi nia,” nia orgullu

Balbina Beno agradese Xefe Estadu 

Entretantu,  Inan-faluk, Balbina Beno, sente kontente tanba Prezidente Repúblika tau-matan ba nia hodi oferese uma di’ak atu hela.

“Ha’u kontente tebes tanba Prezidente hadomi tebes ha’u, ne’e mak ohin mai lansa fatuk dahuluk atu halo ha’u-nia uma fatuk ne’e, ne’ebé ha’u laiha buat ida, ha’u fó de’it obrigado no ha’u reza ba Maromak atu haraik saúde di’ak ba Avo tanba ajuda ona ha’u hanesan kbi’it la’ek ida,” dehan nian.

Entretantu, inan-faluk Balbina Beno, moris iha loron 07 fulan Marsu tinan 1949 iha suku Bobokase sub-rejiaun Pante Makasar.

Alende ne’e, Asesór Prezidente Autoridade RAEOA ba Asuntu Sosiál, Agustinho Caet, dehan iha tinan 2024 inan faluk, Balbina Beno, nia uma monu tanba udan bo’ot akompaña ho anin no konsege estraga totál uma tali ne’e, nune’e ekipa husi Gabinete Prezidente Autoridade RAEOA koordena kedas ho Autoridade Protesaun Sivíl (APC) Oekusi no konsege oferese apoia emerjénsia hanesan ai-han no nesesidade báziku.

“Ami mai to’o ne’e nia husu kedas apoia atu halo nia uma tanba laiha kbi’it atu halo nia uma fali, entaun iha tempu ne’eba ami buka meiu oinsá bele salva nia ai-han no sasán balun iha uma laran, tanba ne’e emerjénsia entau ami hola kalen, mai harii uma emerjénsia ida hodi hela provizória satan nia husi manas no udan-been, depois ita husu xefe suku prepara proposta ida hatama ba Prezidente Repúblika atu apoia, ne’e ohin ita sai sasin hahú halo konstrusaun,” nia dehan.

Jornalista: Abílio Elo Nini

Editór: Florencio Miranda Ximenes