VIKEKE, 06 Maiu 2025 (TATOLI)—Prezidente Repúblika, José Ramos Horta, apoia no entrega uma ba família vulneravél uma-kain ida iha suku Uma Uain Karik, postu Vikeke Vila, munisípiu Vikeke.
Xefe Kaza Sivil Prezidente Repúblika, Jesuína Maria Ferreira Gomes, hatetn inisiativa Prezidente Repúblika, José Ramos Horta, hodi komplementa envezde troka responsabilidade Governu nian maibé prezidente iha kompromisu atu ajuda família vulneravél sira dezde hahú simu pose iha tinan 2022.
“Ita-nia Prezidente Repúblika, José Ramos Horta kontinua kumpre ninia kompromisu hodi fó apoiu ba família vulneravél sira hodi fornese uma foun ba faluk Ana Teresa ho nia oan na’in-neen (6) iha munisípiu Viqueque. Família, ne’ebé uluk hela iha kondisaun mínimu iha uma-kakuluk, simu uma ho medida metru 7×8 ne’ebé foin harii ne’ebé kompletu ho kuartu rua no mobiliáriu, sala ida, varanda, dapur, no instalasaun sira haris-fatin nian,” Jesuína Maria Ferreira Gomes hateten iha serimónia entrega uma ba família vulneravél, iha suku Uma Uain Kraik, domingu (04/05) ne’e.
Kona-ba uma, nia dehan, konstrusaun uma medida 7×8 ho valór rihun $14 resin, halo parte iha programa prezidensiál ida-ne’ebé luan liu ne’ebé harii ona uma 10 ba família vulneravél sira iha tinan 2024, no tuir planu PR sei konstrui uma hitu (7) iha tinan 2025.
“Inisiativa ne’e tuir prosesu ida-ne’ebé pesoál prezidensiál sira, halo identifika fatin potensiál sira molok husu aprovasaun husi Xefe Estadu,” nia dehan.
Iha fatin hanesan, Prezidente Autoriedade Munisípiu Viqueque, Francisco C.S. de Gonzaga Soares, hato’o apresiasaun no agradesimentu ba kompromisu hodi realiza programa sosiál husi Prezidénte Repúblika tanba bele ajuda ema kbiit natoon sira.
“Ha’u apresia no agradese ba Prezidente Repúblika ne’ebé fó ona apoia ba ita-nia família kbiit naton sira iha munisípiu Vikeke. Ha’u husu Viqueque-oan sira kontinua tulun malu, iha atividade ajudu umanitária nian hodi tane nafatin valór kultura maun-alin iha munisípiu Viqueque,” nia hateten.
Benefísiáriu Ana Teresa hato’o agradesimentu ba Prezidente Repúblika ne’ebé apoia ona uma ba ninia família hodi hela iha laran.
“Ami husu agradese ba Prezidente Repúblika ne’ebé apoia ona uma ba ami no ba ha’u-nia oan sira hodi uza. Tanba antes ne’e ami uma kondisaun ladún di’ak mak ami uza. Maibé, liuhusi apoia Prezidente nian ami bele hetan uma di’ak,” nia dehan.
Iha serimónia entrega umaba família benefisiáriu hetan partisipa husi ekipa Prezidente Repúblika, autoridade lokál no komunidade husi suku Uma Uain Kraik.
Jornalista : Vitorino Lopes da Costa
Editór : Cancio Ximenes
