DILI, 16 Maiu 2025 (TATOLI)–Antigu Primeiru-Ministru no atuál Sekretáriu Jerál partidu Frente Revolusionária Timor-Leste Independente (FRETILIN), Marí Alkatiri, hateten nia parte hamutuk ho líder seluk no prontu atu fó solusaun ba dezenvolvimentu atu dezenvolve Timor-Leste.
“Hotu-hotu hatene katak ha’u-nia pozisaun ne’e kritiku, ha’u la subar saida mak ha’u atu ko’alia tuir saida mak ha’u haree. Maibé, ha’u sempre dehan katak ha’u la’ós mai para atu tau tan gazolina iha ahi. Ha’u mai atu buka solusaun, solusaun ba ita nia dezenvolvimentu no hadi’a buat ne’ebé la’o la loos,” Alkatiri hateten ba Agência TATOLI iha Gabinete Eis-Titulár, Faról, sesta ne’e.
Nia dehan, durante tinan 23 nia laran ne’e Timor-Leste gasta ona biliaun lubuk ida ba dezenvolvimentu maibé seidauk la’o ho másimu iha nasaun ida-ne’e.
“Ita hatene ho osan barak ne’ebé ita gasta bele fó benefísiu ba povu, maibé ida-ne’e seidauk akontese. Ohin loron ita bolu stunting labarik sira ho idade tinan ida (1) to’o tinan lima (5) komprometidu ona sira nia dezenvolvimentu, tinan ida (1) ho tinan lima (5) balun krekas maran liu. Ita tenke hanoin atu rezolve lalais buat sira-ne’e tanba futuru nasaun ida-ne’e iha labarik joven sira-nia liman,” nia dehan.
Aleinde ne’e, nia husu ba Governu atu halo jestaun di’ak ba fundu petróliferu ne’ebé daudaun ne’e iha no labele hanoin atu gasta de’it.
“Ha’u husu de’it ho haraik aan, favór ida halo jestaun di’ak ba osan sir- ne’e, labele gasta de’it no gasta de’it,” nia dehan.
Nune’e, nia husu atu hapara ona broker ne’ebé daudaun ne’e barak iha Timor-Leste, atu nune’e bele iha jestaun ida di’ak ba Timor-Leste nia osan.
“Ita tenke hanoin uitoan ba povu ida ne’e. Ia tenke hanoin uitoan ba jerasaun foun sira-ne’ebé sei sira-nia futuru sei,” nia dehan.
Jornalista : Hortencio Sanchez
EDitór : Cancio Ximenes
