BAUKAU, 16 Maiu 2025 (TATOLI)—Autoridade lokál husu Autoridade Protesaun Sivíl (APC-sigla portugés) atu reverifika dadus vítima dezastre naturál tanba benefisiáriu balun seidauk simu apoia materiál rekuperasaun.
Xefe Suku Afasá, Postu Administrativu Kelikai Antiga, Joaquim Fernandes Ximenes, hateten ekipa verifikadór husi APC ne’ebé rekolla dadus vítima dezastre naturál seidauk inklui komunidade balun husi Suku Afasá nune’e nu’udár responsável suku rekomenda atu materiál ne’ebé apoia tenke distribui mós ba komunidade afetadu iha área referida.
“Lista ne’ebé verifika lori bá nasionál la inklui inan-faluk ne’ebé uma hetan estragu totál naran la sai nu’udár benefisiáriu,” Xefe Suku Afasá hateten iha arredór Administrasaun Munisipál Vila Nova, Baukau, sesta ne’e.
Notísia relevante: Vítima dezastre naturál uma-kain 119 simu materiál rekuperasaun iha Baukau
Nia haktuir, vítima feto ho naran Albertina Viana husi Aldeia Uligata, ninia uma hetan estragu kauza husi udan akompaña anin-boot sobu to’o estragu totál, nune’e obrigadu tenke evakua ba família nia uma to’o oras ne’e seidauk hetan apoia ruma no kontinua hela ho família.
“Ami rekomenda APC atu konsidera inan-faluk ne’e tanba laiha ema ruma tau matan ba nia,” Joaquim Ximenes rekomenda.
Iha fatin hanesan, Diretór Ezekutivu Autoridade Protesaun Sivíl, Gui Sávio V. Caeiro, hateten nia rejista rekomendasaun husi autoridade lokál relasiona ho vítima balun ne’ebé seidauk hetan apoia, nune’e ekipa verifikadór sei reverifika fali antes apoia materiál rekuperasaun no orsamentu mão de obra.
“Ida-ne’e rekomendasaun, ita rona no konsidera. Ita sei haree fali ekipa verifikadór sira atu reverifika fali,” Gui Caeiro hateten.
Gui salienta, aleinde husi APC, ekipa verifikadór envolve mós membru Ofisiál Polísia Suku (OPS), parseiru dezenvolvimentu hanesan Krúz Vermella Timor-Leste (CVTL-sigla portugés) no Autoridade Munisipál sei rekolla hikas dadus iha terrenu hodi deside tuir kategoria estragu.
Entretantu, Sekretaria Estadu Protesaun Sivíl (SEPS) distribui ona apoia materiál rekuperasaun no orsamentu mão de obra ba vítima dezastre naturál hamutuk uma-kain 119 ho totál orsamentu hamutuk $74.700 no materiál rekuperasaun kompostu kalen, besi kotak, pregu, balde, martelu, kanuru-boot no ki’ik inklui seluk tan.
Jornalista: Natalino Belo
Editór: Xisto Freitas da Piedade
