BAUKAU, 16 Maiu 2025 (TATOLI)—Governu liuhosi Sekretaria Estadu Protesaun Sivíl (SEPS) distribui apoia materiál rekuperasaun no orsamentu mão de obra ba vítima dezastre naturál hamutuk uma-kain 119 iha Munisípiu Baukau.
Diretór Ezekutivu Autoridade Protesaun Sivíl, Gui Sávio V. Caeiro, esplika materiál ne’ebé governu apoia atu rekupera vítima dezastre naturál tanba hetan estragu iha tinan-2024 ho objetivu atu ajuda benefisiáriu sira konstrui hikas uma iha kada área ne’ebé fahe ba postu neen iha Munisípiu Baukau.
“Ba benefisiáriu sira husu atu utiliza materiál hotu tuir dalan ho dignu tanba fulan tolu ita sei halo monitorizasaun direta iha terenu,” Diretór Ezekutivu Autoridade Protesaun Sivíl hateten iha Arredór Administrasaun Munisipál Vila Nova, Baukau, sesta ne’e.
Nia husu vítima sira-ne’ebé sai benefisiáriu ba apoia materiál rekuperasaun atu utiliza ekipamentu hodi konstrui fali uma no rekomenda atu komunidade hotu labele konstrui uma iha fatin risku hanesan mota ninin, foho-lolon inklui tasi-ibun.
Iha fatin hanesan, benefisiáriu Simão Freitas nu’udár vítima husi Aldeia Muku-muku, Suku Lakuliu, Postu Administrativu Kelikai, hato’o agradesementu ba Governu tanba apoia materiál rekuperasaun nune’e bele konstrui hikas uma ne’ebé hetan estragu iha tinan-2023 liubá.
“Materiál hirak-ne’e hakmaan netik ami-nia sofrimentu,” Simão argumenta.
Tuir dadus, husi numéru vítima referida maioria afetadu dezastre naturál iha Postu Kelikai hamutuk uma-kain 60 kompostu aat tolu (3) no aat natoon 57, Baukau Vila 19 kompostu aat tolu (3) no aat-kamaan 16, Venilale hamutuk 16 kompostu aat-totál rua (2) no aat-kamaan 15.
Postu Laga totál vítima 11 kompostu uma-kain rua (2) aat-natoon no uma-kain sia (9) kategoria aat-kamaan, Postu Vemasse hamutuk uma-kain 10 ho kategória aat-totál ida, aat-natoon haat (4) no aat kamaan lima (5) no Postu Administrativu Baguia hamutuk uma-kain 2, kategoria aat-natoon.
Totál orsamentu ne’ebé aloka ba uma-kain 119 hodi apoia mão de obra no transporte hamutuk $74.700 ne’ebé kada uma-kain sei simu ho kategoria aat-totál $750, aat-natoon $600 no aat-kamaan $450.
Husi totál orsamentu referidu aloka ba kada postu administrativu hanesan Kelikai hamutuk $37.450, Postu Baukau Vila $11.850, Postu Venilale rihun $11, Postu Vemasse rihun $7, Laga rihun $6.900 no Postu Baguia hamutuk $1.500.
Entretantu, materiál rekuperasaun ne’ebé vítima sira simu kompostu kalen, besi kotak, pregu, balde, martelu, kanuru-boot no ki’ik inklui seluk tan ne’ebé bazeia ba kategoria estragu.
Jornalista: Natalino Belo
Editór: Xisto Freitas da Piedade
