DILI, 16 Maiu 2025 (TATOLI)—Dom Virgílio Kardeál do Carmo da Silva, hateten Padre Domingos Soares Maubere nia mate-isin sei haloot iha Semitériu Padre sira-nian, iha Maloa, Ailok-Laran, Dili, 19 Maiu 2025.
“Segunda, 19 Maiu, ita sei halo misa fúnebre iha Igreja Katedrál, Vila Verde, Dili. Hafoin ne’e, lori Saudozu Amu Maubere nia mate-isin bá Semitériu Maloa,” Dom Virgílio dehan ba jornalista sira, iha Hospital Nacional Guido Valadares (HNGV), Bidau, sesta ne’e.
Notísia relevante: Parókia Letefoho preparadu simu Padre Domingos Maubere nia kadáver
Kardeál husu ba sarani sira hakarak presta omenajen ba padre Domingos Maubere nia mate-isin, aban meudia fila husi Letefoho bá liu Igreja Bekora no misa fúnebre ikus tuku 10:00 iha Katedrál Dili.
“Lori Arkidioseze Dili no hamutuk ho família tomak hakarak agradese ba iha Governu liuhusi Ministériu Saúde ne’ebé iha momentu tinan 2022 bainhira Padre Domingos hetan moras, ajuda evakua bá halo tratamentu iha Jakarta, depois filafali bá Malázia. Esforsu sira-ne’e Governu halo hotu atubele tulun hodi rekupera Amu Domingos nia saúde, maibé ikusmai labele duni rekupera. Ita agradese ba Maromak ne’ebé haraik Padre Domingos mai ita hanesan figura ida no to’o ikus ita laran moras tanba ita lakon Padre Domingos iha ita-nia leet,” Dom Virgílio tenik.
Dom Virgílio mós agradese ba médiku-hotu hotu ne’ebé durante ne’e fó tratamentu ba Padre Domingos nia saúde, liuliu médiku sira iha HNGV, Siloam Jakarta no Ospitál KPJ Malázia. Dioseze no família hakarak hato’o agradese ba sakrifísiu hirak-ne’e, tanba hakarak salva Amu, maibé forsa la to’o atu manán Amu Maubere nia moris,” nia afirma.
Jornalista: Felicidade Ximenes
Editór: Xisto Freitas da Piedade
