Maktoban Padre Domingos Maubere to’o ona iha Parókia Bekora

DILI, 17 Maiu 2025 (TATOLI)—Padre Domingos da Silva Soares Maubere nia mate-isin hatuur ona iha Parókia Sagrado Coração de Jesus Bekora, hafoin kalan ida iha Parókia Letefoho, Munisípiu Ermera, hodi hetan presta omenajen husi família no sarani sira iha-ne’ebá.

Pároku Parókia Sagrado Coração de Jesus Bekora nia kadáver to’o iha parókia referida iha sábadu loraik ne’e, iha-ne’ebé entrega husi FALINTIL-Forsa Defeza Timor-Leste (F-FDTL) no simu husi sarani rihun ba rihun ho matan-been.

Arsebispu Metropolitana Dioseze Dili, Dom Virgílio Kardeál do Carmo da Silva, hateten Maktoban Amu Maubere sei loron rua (17-18 Maiu) hamutuk ho sarani sira iha Parókia Bekora, nune’e sarani sira bele hatudu sira-nia domin no sira-nia agradesimentu tanba durante tempu naruk Amu Maubere hamutuk ho sira iha-ne’ebá.

“Tanba ne’e, husu sarani hotu atu hasa’e orasaun ba Amu Du nia klamar nune’e Maromak bele simu nia iha Nai nia sorin no Amu Du mós husu ita atu halo kompleta buat ne’ebé nia seidauk halo kompleta bainhira nia sei moris,” Kardeál tenik.

Notísia relevante: Padre Domingos Maubere sei haloot iha Semitériu Padre Maloa

Entretantu, bainhira kadáver Amu Maubere to’o Bekora, sarani sira husi labarik to’o ferik no katuas sira tanis hasoru tanba lakon Amu di’ak ida iha sarani Timor nia leet.

Hafoin ne’e, kuaze kada bairu, grupu kategoria oinoin, joven sira, entidade Governu, entidade igreja no sosiedade sivíl sira seluk ba presta omenajen no hasa’e orasaun ba Amu Maubere nia mate-isin. Iha momentu ne’e kedas, realiza mós misa requiem.

Tuir ajenda, sei realiza misa fúnebre ba Amu Maubere iha Igreja Katedral Dili, iha segunda (19/05), tuku 10:00 Otl, prezididu husi Arsebispu Metropolitana Dioseze Dili, Dom Virgílio Kardeál do Carmo da Silva. Hafoin misa, sei haloot Maktoban iha Semitériu Padre sira-nian iha Maloa, Ailok-Laran, Dili.

Biográfia Amu Maubere

Amu Domingos da Silva Soares, moris iha Suku Dokurai, Letefoho, Munisípiu Ermera, 12 Maiu 1952, husi aman naran Isaias José Soares no inan naran Teresa da Silva Soares.

Iha tinan 1956, Amu Domingos simu batizmu husi Reverendísimu Padre José Álvaro Nolosco Santimano e Monteiro, iha kapela Fatubesi. Iha tinan 1964, Amu Domingos simu primeira komuniaun iha Koléjiu Infante de Sagres Maliana husi Reverendísimu Padre Manuel Silveiro Luís.

Iha tinan 1960-1966, tama eskola primária katólika iha misaun Ermera no kompleta ninia eskola iha Koléjiu Infante de Sagres Maliana. Iha tinan 1966, tama pré-semináriu iha São Francisco Xavier Dare no hahú nia formasaun preparatória ba dalan nai-lulik nian.

Iha tinan 1967, simu Sakramentu Krizma husi Dom José Joaquim Ribeiro. Iha tinan 1967-1973, kompleta kursu segundo ano to’o sétimo ano iha nível sekundáriu iha semináriu menór Nossa Senhora de Fátima Dare. Iha fulan-Outobru 1973, tama iha semináriu konselár São Pedro no São Paulo hahú ho ano propriedético.

Iha tinan 1974-1978, tuir kursu teolójia iha semináriu São Pedro no São Paulo Braga. Iha loron 27 Marsu 1977, simu ministériu leitór husi Dom Manuel Pereira Cabral iha kapela semináriu konselár Braga. Iha loron 17 Jullu 1977, simu ministériu akólitu husi Dom Manuel Pereira Cabral iha semináriu konselár Braga.

Iha loron 12 Marsu 1978, simu ordenasaun diakonál husi Dom Manuel Pereira Cabral, bispu ausiliár Arkiodioseze Braga. Iha loron 16 Jullu 1978, simu ordenasaun prisbeterál iha kapela semináriu menór Nossa Senhora Imaculada Conceição Braga husi Dom Eurico Dias Nogueira, Arsebispu Primas de Braga.

Iha 19 Maiu 1980, fila husi Braga mai Timor ho kolega Amu Domingos Alves, no iha loron 19 Maiu ne’e mós Amu Domingos Maubere to’o ona iha Timor. Iha loron 10 Juñu 1980, nomeadu nu’udár superiór demisaun Santa Terezinha Ossu (Vikeke).

Iha tinan 1982, nomeadu nu’udár superiór demisaun Uatulari no nu’udár Prezidente Komisaun Diosezana Katekétika. Iha tinan 1983, nomeadu nu’udár Diretór Institutu Pastorál Dili. Iha tinan 1988, muda hikas husi Parókia Ossu mai Dili. Iha loron 05 Agustu 1990, nomeadu nu’udár Pároku Parókia Suai.

Iha loron 16 Jullu 1994, simu pose nu’udár Pároku Parókia Nossa Senhora do Carmo Letefoho. Iha loron 01 Jullu 1997, simu prémiu pás kriste internasionál iha Leondras husi Eminiénsia Kardeál Sweanes de Béljika.

Iha tinan 1997-1998, Amu Domingos hamutuk ho nia belun Amu Filomeno Jacob hasoru-malu ho líder polítiku sira iha rai-li’ur hodi organiza oinsá forma plataforma unidade nasionál hodi ikusmai harii Konsellu Nasionál Rezisténsia Timorense (CNRT-sigla portugés) ne’ebé hakerek no harii ninia estatutu “karta-magna”.

Iha loron 01 Setembru 2002, simu pose nu’udár Pároku Parókia Nossa Senhora de Lourdes Ermera. Iha tinan 2018, simu pose nu’udár Pároku Parókia Sagrado Coração de Jesus Bekora to’o hakotu iis iha 16 Maiu, tuku 07:20 Otl.

Jornalista: Alexandra da Costa
Editor: Xisto Freitas