DILI, 19 Maiu 2025 (TATOLI) – Família no sarani sira sira hamonu matan-been bainhira fúnebre maktoban amu Domingos “Maubere” iha semitériu padres Maloa, Ailok-laran Dili, ohin.
Antes atu fúnebre iha mós misa requiem ne’ebé prezide husi arsebispu metropolitana arkiodioseze Dili, Bispu Dioseze Maliana no Bispu Dioseze Baukau iha Katedrál Imaculada da Conceição, Vila Verde, Dili.
Hafoin misa requiem sei kontinua kedas ba fúnebre iha semitériu padres Maloa, Ailok-laran, Dili.
Arsebispu Meteopolitana Arkiodioseze Dili, Dom. virgílio Kardeal do Carmo da Silva hateten, Maktoban hatudu mai ita katak, oras ne’e nia toba ona nia la terus tan ona, nia la moras tan ona tanba nia ba hamutuk ona ho Maromak ne’ebé kria mundu ne’e.
“Amu Du mate iha fulan na’in-feto nian. Nia aguenta to’o ho nia kondisaun ne’e hodi selebra nia tinan moris nian iha loron 12 fulan-Maiu 2025 ba da-73”, Arsebispu ne’e informa.
Domin ne’ebé nia fó ba igreja to’o ona. Nia la moras tan ona nia la terus tan ona. Nia entrega nia aan ba Maromak.
“Maske amu Du laiha ona maibé nia espíritu sei moris iha ne’e liuhusi rai-rahun ne’ebé nia husik hela mai ita nu’udar amu-lulik. Tan ne’e loron ida ami dehan de’it obrigadu ami Domingos “Du” tan ita boot aman ba nasaun no igreja Timór”, Kardeál ne’e hateten.
Antes atu translada maktoban husi igreja katedrál ba semitériu Ailok-laran mós sarani husi otas ba otas hahú la’o ona ba semitériu hodi asiste diretamente prosesu funerál amu Du nian.
Tuir observasaun durante misa família sira tanis hodi bolu amu Du nia naran tanba sira sente lakon aman no padre ida iha família.
Entretantu, aleinde sarani no família no amu inklui madre sira mak partisipa maibé iha mós entidade Governu hanesan, VPM-1, ME, MS, PDHJ, Eis titulár sira, SEATOU no seluktan.
Jornalista: Alexandra da Costa
Editór: Rafael Ximenes de A. Belo
