DILI, 19 Maiu 2025 (TATOLI) – Ministériu Edukasaun (ME) hamutuk ho Prezidente Funsaun Públika (KFP), segunda ne’e, ne’ebé akompaña husi Prezidende Repúblika, José Ramos Horta’, ofisialmente halo abertura ba teste eskrita eletrónika ba bolsa kandidatu sekundáriu.
“Ohin ita halibur hamutuk iha momentu importante tebes ba futuru edukasaun iha Timor-Leste nian ba serimónia abertura, teste bolsa kandidatu ba futuru profesór sira hodi hanorin iha ita-nia eskola sekundária sira,” nia katak.
Teste ida-ne’e marka momentu importante iha edukasaun, hodi garante katak saladeaula iha eskola sei lidera hosi manorin sira-ne’ebé la’ós de’it iha dedikasaun, maibé mós abilidade no koñesimentu nesesáriu hodi forma foinsa’e sira iha Timor-Leste nia hanoin,” Ministra Edukasaun, Dulce de Jesus Soares, ko’alia iha KFP, Matadouru.
Nune’e ohin prezensa Prezidente Repúblika nian hanesan onra no priviléjiu ida hodi partisipa iha okaziaun signifikante ida-ne’e hodi nafatin apoiu kontinuidade ba funsionáriu públiku iha ME atu halo servisu ho di’ak.
“Ami koko daudaun halo servisu ida atu lori edukasun ba sistema ida di’ak ba funsaun públika nia servisu nune’e mós Ministériu Edukasaun nia servisu,” nia dehan.
Selesaun bolsa kandidatu ba Ensinu Sekundáriu tinan-ida ne’e, kandidatu sira-ne’ebé admitidu atu tuir teste mak hamutuk na’in-10.679.
Husi númeru ida-ne’e, feto hamutuk na’in-5.748 no mane na’in-4931. Interesante tebes haree númeru ida-ne’e, tanba númeru aplikante feto hatudu interese maka’as hodi aplika ba konkursu bolsa kandidatu nian.
“Ida-ne’e serve hanesan instrumentu ida atu avalia kompeténsia no profisiénsia hosi profesór potensiál sira iha área ka matéria xave sira-ne’ebé esensiál ba ensinu sekundáriu,” nia katak.
Nune’e matéria sira hanesan matemátika, siénsia, língua sira, ekonomia, istória no geografia mak hanesan pilár sira-ne’ebé ita harii fundasaun akadémika ba estudante sira.
Nia dehan, teste ida-ne’e dezeña la’ós de’it atu avalia koñesimentu jerál no espesífiku, maibé mós atu sukat abilidade pedagójiku nian.
“Profisaun hanesan manorin, la’ós de’it atu halo diseminasaun ba informasaun, maibé hanesan mós paixaun ida hodi inspira estudante sira ho kuriozidade, haburas talentu no haburas ambiente ida iha ne’ebé estudante ida-idak bele buras. Ita-nia manorin sira iha futuru tenke hatudu sira-nia abilidade atu envolve estudante sira, halo adaptasaun ba métodu aprendizajen oioin, no kria esperiénsia edukasionál inkluzivu sira-ne’ebé bele halo impaktu pozitivu ne’ebé dura”, nia dehan.
Governante ne’e hatutan, teste ne’e mós kompoin hosi pergunta sira-ne’ebé 80% lian portugés no 20% lian tetun. portugés tanba maioria matéria ne’ebé hanorin iha nível sekundáriu mak uza lia-portugés, maibé 20% iha tetun, tanba ita-nia nasaun iha lian ofisiál rua, tanba ne’e profesór sira tenke domina rua hotu.
Nia dehan, teste ne’e rigorozu uitoan, tanba tenke reflete dignidade hosi kandidatu sira-nia profisaun, tanba sai profesór mak vokasaun ida, la’ós maneira ida atu buka osan de’it.
“Ita-nia nasaun só bele avansa ba oin bainhira ita-nia sistema edukasaun iha kualidade no konsege eduka sidadaun sira-ne’ebé sei kontribui ho másimu ba ita-nia dezenvolvimentu no seguransa.”
Iha fatin hanesan, Sekretáriu Estadu Ensinu Sekundáriu Jerál no Tékniku Vokasionál, Domingos Lemos Lopes, dehan vaga ba manorin sekundáriu jerál no Tékniku Vokasionál ne’e agora tau prioridade ba 1.500.
Governante ne’e mos argumenta, Ensinu Sekundária Tékniku Vokasionál sira sistema modulár no sei rekruta sira parsiál de’it tanba modulu ida só bele hanorin fulan tolu de’it.
“Ezemplu profesór ida nia hanorin modulu ida fulan tolu hotu ona no fulan tolu oin fali mai nia la hetan ona, só tinan oin mak bele hetan fali entaun ita halo kontratu parsiál de’it nune’e modulu nee iha profesór mai hanorin,” nia konklui.
Jornalista : Osória Marques
Editór: Evaristo Soares Martins
