DILI, 19 Maiu 2025 (TATOLI) – Pastor husi Igreja Protestante Hosana iha Timor-Leste, Lourenço dos Santos, sujere ba reprezentante partidu polítiku sira iha Parlamentu Nasionál tenki kria unidade no promove fraternidade umana.
Lourenço dos Santos hato’o deklarasaun ne’e relasiona ho Aniversáriu Restaurasaun Independénsia ba da-23, ne’ebé selebra iha 20 Maiu.
“Labele hatun malu, tolok malu no baku malu iha uma Fukun Parlamentu Nasionál, maibé tenki hatudu morál no étika ne’ebé di’ak hodi ko’alia ba malu. Selae ita nunka hakat ba oin. Tenki kria unidade no promove fraternidade entre partidu ida ho partidu sira seluk iha Parlamentu”, Pastor dehan ba TATOLI, liuhusi WhattShapp.
Lourenço dos Santos akresenta katak maske líder partidu polítiku sira iha vizaun ne’ebé diferente, tenki mantein valór fraternidade umana hodi kontribui ba unidade no paz.
Nia husu ba Ezekutivu hodi fó prioridade ba setór agricultura, saúde, edukasaun, infraestrutura no turizmu. “Nai ulun sira husi relijiaun lima to’o agora iha toleránsia ba malu. Asosiasaun Turizmu Relijiaun Timor-Leste sempre la’o hamutuk iha orasaun hodi hala’o atividade sira hodi dezenvolve paíz ida ne’e”, nia konsidera.
Pastor rekomenda ba ukun-na’in sira hodi implementa estatéjia nasionál ba kombate ki’ak iha rai Timor-Leste. “Ita hadomi rai doben ne’e, maibé kuandu na’in-ulun sira halo korupsaun buras ba beik-beik, mak ki’ak no mukit sei aumenta tan”, dehan nia.
Lourenço dos Santos konsidera komemorasaun Aniversáriu Restaurasaun Independénsia importante tebes ba povu Timor-Leste hodi hanoin hikas fali saida mak akontese iha tinan hirak liu ba. “Ita hotu tenki halo refleksaun ba luta ida ne’e. Ukun aan ida ne’e, sosa ho ran no isin ne’ebé naklekar ba rai doben, ne’ebé ohin loron ita bele goza”, nia lembra.
Notísia relasionada: Kardeál: Ema hotu tenke iha vontade di’ak hodi dezenvolve Timor-Leste
Jornalista: Jesuína Xavier
Editora: Isaura Lemos de Deus
