DILI, 20 Maiu 2025 (TATOLI)—Governu liuhusi Vise-Ministru Asuntu Parlamentár, Adérito Hugo da Costa, rejeita ho deklarasaun husi Prezidente Partidu Frente Revolusionária Timor-Leste Independente (FRETILIN), Francisco Guterres Lú Olo, nia deklarasaun ka mensajen kona-ba “Timor-Leste iha pás maibé ukun halo povu terus”.
Notísia Relevante: Timor-Leste iha pás maibé povu terus nafatin
“FRETILIN sira iha dever polítika la’ós morál atu espresa ba dezempeña Governu nian, maibé atu hateten katak Governu ida-ne’e fulan-Jullu foin kompleta nia mandatu tinan rua (2). Mandatu Governu ida-ne’e kontinua de’it saida mak Governu anteriór husik hela, liuliu problema barak ne’ebé sira husik hela iha setór hotu-hotu,” Vise-Ministru ne’e hateten ba Agência TATOLI iha aeroportu Internasionál Prezidente Nucolau Lobato, Comoro, tersa ne’e.
Nia dehan, Governu halo esforsu hotu hodi rezolve problema ne’ebé husik hela atu halo diagnóstika no tinan ida-ne’e proklama no implementa programa sira Governu Konstitusionál da-sia (IX) nian.
“Bainhira halo diagnóstika ba problematika sira-ne’ebé Governu anteriór husik hela, la’ós buat ne’ebé kmaan. Sira husik buat hotu falladu, setór hotu-hotu kuaze ekstagnadu, hanesan setór edukasaun, saúde, infraestrutura hodi abandona hotu obra sira iha ita-nia país ne’e. Entaun, ami foti tempu tinan ida hodi halo diagnóstika, entaun tinan ida-ne’e mak Governu foin halo servisu loloos,” nia tenik.
Nia hatutan, FRETILIN nafatin espresa sentimentu polítiku krítiku maibé Governu Konstitusionál da-sia (IX) kontinua hala’o servisu ba povu no nasaun.
“Dehan halo terus povu iha fatór saida. Se ita atu halo dezenvolvimentu hanesan eviksaun, ne’e la’ós halo terus povu, ita halo eviksaun iha Dili ne’e mak sira hakarak espekula, sira haree espasu seluk laiha hodi halo krítika, ida-ne’e labele. Sira iha Governasaun anteriór hakarak hela atu halo, maibé tanba tauk lakon votus mak la halo maibé votus tun aat liu iha eleisaun. Ami hatene uluk sira halo sensibilizasaun ba komunidade afetadu sira maibé la brani hasai povu sira,” nia esplika.
Tuir nia, Governu Konstitusionál da-sia (IX) lakohi halo politizasaun ba kestaun hirak ne’e no foku ba servisu hodi halo dezenvolvimentu ba povu no nasaun.
“Iha Dili laran komuniade koopera hela, muda sira husi fatin afetadu ba fatin di’ak. Sira-ne’ebé hela iha Kuluhun to’o Bekora kona eviksaun atu halo luan estrada barak koopera, hela família ida (1) ka rua (2) mak seidauk koopera maibé ba oin Governu haree atu resolve. Agora opozisaun sira atu buka tan maneira saida, ami foku ba oinsá halo dezenvolvimentu,” nia dehan.
Jornalista : Hortencio Sanchez
Editór : Cancio Ximenes
