DILI, 20 Maiu 2025 (TATOLI)—Prokutadór Jerál Repúblika, Nelson de Carvalho, hateten to’o oras ne’e Ministeruu Públiku (MP) seidauk redelega kompeténsia ba Komisaun Antí Korrupasaun (CAC-sigla portugés) tanba Prokuradór Titulár sei hala’o hela investigasaun.
Nia dehan, kazu ne’e nu’udár reputasaun prosesuál, tanba ne’e nu’udár Prokuradór Jerál Repúblika labele fó komentáriu ba ida-ne’e.
Notísia relevante: PM Xanana hatán deputadu sira-nia preokupasaun kona-ba ró Haksolok
“Prosesu sira-ne’e iha ona Ministériu Públiku. Agora sei halo hela prosesu investigasaun. Prosesu ne’e sei kontinuasaun ba iha investigasaun. Tanba ida-ne’e reputasaun prosesuál, ha’u labele ko’alia tanba iha faze investigasaun nia laran,” Nelson hateten ba jornalista sira iha Palásiu Prezidensiál, Bairru-Pite, tersa ne’e.
Tuir Nelson katak investigasaun ba kazu ne’e sei lori tempu naruk, tanba iha investigasaun ne’e iha kestaun barak mak sei koloka iha-ne’ebá.
Notísia relevante: Auditória internasionál ba ró Haksolok la’o hela
Iha fatin hanesan, Komisáriu CAC, Rui Pereira dos Santos, informa sei hasoru-malu ho Prokuradór Jerál Repúblika hodi ko’alia kona-ba prosesu Ró Haksolok, tanba to’o agora Ministériu Públiku seidauk halo redelagasaun ba iha Komisaun Antí Korrupasaun atu halo investigasaun.
“Ita espera ho Prokuradór Jerál Repúblika foun ne’e ami bele hetan malu, tanba kazu sira-ne’ebé iha Oekusi nian hanesan Ró Haksolok ne’e, redelegasaun seidauk mai ami CAC atu haree filafali, tanba prosesu sira-ne’e antes ne’e CAC mak halo hela investigasaun, maibé momentu ne’ebá komisáriu CAC seidauk iha mak prosesu sira-ne’e lori hikas bá iha Ministériu Públiku,” nia konklui.
Jornalista: Natalino Costa
Editór: Xisto Freitas da Piedade
