DILI, 25 Fevereiru 2025 (TATOLI)-Vise Ministru ba asuntu Parlamentár, Adérito Hugo da Costa, informa auditória internasionál ba ró Haksolok dadaun la’o hela.
Notísia relevante: MP delega kompeténsia ba CAC hakle’an investigasaun ba Ró Haksolok
“Kona-ba ró Haksolok ninia resposta klaru ona husi Deputadu sira. Maibé pozisaun Governu atualiza progresu pontu situasaun auditória internasionál, informa ona iha fulan hirak liu-ba ein-progresu, rápidu posível rezultadu sei fó iha fulan rua ka tolu tan, aprezenta ba Estadu no Governu nu’udar na’in ba projetu auditória internasionál, depois lee sai rezultadu”, Reprezentante Governu ne’e responde preokupasaun Deputadu sira-nia iha reuniaun plenária Parlamentu Nasionál (PN), tersa ne’e.
Nia mós responde kona-ba Deputadu sira foti kona-ba investimentu ne’ebé autoridade Rejiaun Administrativu Espesiál Oekusi Ambenu (RAEOA) anteriór hala’o ba estaleiru iha Portugál ne’ebé ho 99% asionista parte Estadu Timor-Leste. Maibé, agora husi Governu foun relativa tipu investimentu iha de’it ita-nia rai laran ho valór billaun dolár ne’ebé nia progresu la’o hela sei halao iha Laleia-Manatutu ne’ebé sei prodús ka fábrika ró ba nesesidade konetividade marítima la’ós iha nasaun de’it maibé ba internasionál.
“Investimentu ne’e mai husi Japaun sei kria kampu traballu ba ita-nia joven timoroan 1.000-resin, portantu kontinua aproxima investidór aproveita ita-nia potensialidade investimentu iha nasaun ne’e nu’udar merkadu potensiál ezije kualker tipu investimentu”, nia akresenta.
Governu komprometidu kontinua serbisu iha setór ne’e konta mós ho adezaun Timor-Leste ba Organizasaun Mundiál Komérsiu (OMK) upgrade ita-nia fasilidade infraestrutura iha setór indústria, komérsiu, portu, aeroportu ho seluk tan aproveita ponténsia merkadu rejionál no internasionál.
Notísia relevante: PN aprova millaun $127 ba RAEOA inklui millaun $14 finaliza Ró Haksolok
Deputadu bankada Governu husi Kongresu Nasionál Rekonstrusaun Timorense (CNRT, sigla portugés), Gabriel Soares, preokupa orsamentu millaun $14 ne’ebé aumenta tan ba ró Haksolok maibé to’o agora roo ne’e seidauk mai Timor-Leste, nune’e presiza investiga.
Deputadu opozisaun husi Frente Revolsionária Timor-Leste Independente (Fretilin), Antoninho Bianco, dehan prezidente RAEOA anteriór konsege halo investimentu, la’ós kestaun ró Haksolok, ida ne’e kestaun simples.
“Governu presiza asume responsabilidade, Governu ne’e kontinuasaun, agora pelumenus prezidente autoridade investe estaleiru, se 95% estaleiru ne’e dono Estadu Timor-Leste, primeiru pasu Estadu ne’e reprezentante Governu sentrál iha tempu ne’eba Prezidente autoridade konsege investe fora husi país, ida ne’e orgullu ba ita”, realsa.
Nia hateten, agora kestaun estaleiru funsiona, ida ne’e atu produs barak la’ós ró Haksolok de’it.
Deputada opozisaun husi Partidu Libertasau Populár (PLP), Maria Angelina Sarmento Lopes, dezáfia Governu atuál aprezenta relatóriu auditória ne’ebé iha debate OJE Primeiru Ministru (PM) rasik promete ona.
“Kona-ba aumenta millaun $14 ba ró Haksolok, pergunta ne’e aprezenta ona ba Primeiru Ministru ne’ebé promete ona atu halo auditória externa, ita hotu hein rezultadu auditória internasionál”, nia tenik.
Hanesan opozisaun espera Governu sei aprezenta rezultadu auditória hodi fó klaru ba públiku, tanba públiku iha direitu asesu rezultadu auditória hodi kontribui transparánsia, akuntabilidade, boagovernasaun iha nasaun ne’e.
Notísia relevante: PM Xanana deside halo auditória internasionál ba ró Haksolok-aviaun ZEESM
Jornalista : Nelson de Sousa
Editora : Rita Almeida
