DILI, 19 outubru 2022 (TATOLI)— Diretór Investigasaun iha Komisaun Anti Korrupsaun (CAC, sigla portugés), José Verdiál, hateten Ministériu Públiku delega ona kompeténsia ba CAC atu hakle’an investigasaun ba Ró Haksolok inklui projetu 332 ne’ebé hola parte iha Zona Espesiál Ekonómia Merkadu Sosiál (ZEEMS).
“Ami simu ona delegasaun kompeténsia hosi Ministériu Públiku iha fulan hirak liuba, hodi halo investigasaun ba kazu Ró Haksolok inklui projetu sira ne’ebé hola parte Zona Espesiál Ekonómia Merkadu Sosiál (ZEEMS)”, Diretór Investigasaun CAC, hateten ba agência TATOLI via telefónika, kuarta ne’e.
Notísia relevante:Alkatiri: Ita hahú prepara tripulante ba Ró Haksolok
Ekipa investigasaun CAC dezloka ona ba iha Rejiaun Administrativa Espesiál Oé-Cusse no Ambeno (RAEOA) atu hahú halo investigasaun ba sasin sira, rekolla faktu no prova sira balun.
MP fó prazu ba CAC halo investigasaun durante loron 90, maibé durante investigasaun la’o maka la konsege tuir prazu mak sei husu bá MP atu aumenta tan prazu investigasaun.
“Depende ba iha faktu sira ne’ebé ita rekolla, tanba ita boot sira hatene prosesu ba kazu Ró Haksolok ida ne’e kle’ur ona, entaun presiza mós tempu para depois ita bele halibur informasaun no dokumentu sira. Nune’e ha’u labele komenta buat barak”, katak
Alende ne’e, CAC mós simu delegasaun kompeténsia hosi Ministériu Públiku (MP) atu loke investigasaun ba kazu korrupsaun no partisipasaun ekonómia no negósiu, pekulatu, pekulatu de uzu, abuzu poder no krime ilísitu hamutuk 38.
Notísia relevante: Konstrusaun Ró Haksolok iha Portugál atinje ona 65%
Jornalista: Natalino Costa
Editór : Florencio Miranda Ximenes
