KOVALIMA, 20 Maiu 2025 (TATOLI) – Timor-Leste (TL) komemora ona nia restaurasaun independénsia ba da-23 iha tinan ne’e ho tema Hametin pás no dezenvolvimentu. Iha ámbitu komemorasaun ida-ne’e, munisípiu Kovalima nafatin hala’o dezenvolvimentu hanesan hadi’a estrada no seluktan ba komunidade sira.
Prezidente Autoridade munisípiu Kovalima, Miguel Armada Cardoso dehan, komemorasaun loron restaurasaun independénsia 20 Maiu ne’e importante nune’e funsionáriu no komunidade sira partisipa iha seremónia loron 20 Maiu.
Iha seremónia ne’e, Prezidente Autoridade munisípiu Kovalima mak sai inspetór seremónia hodi hala’o pasa revista ba formatura sira.
“Ho komemorasaun loron independénsia ba dala-23, ita presiza kontinua hala’o dezenvolvimentu. Daudaun-ne’e, ita identifika ona projetu husi fundu infraestrutura hitu”, Miguel Armada Cardoso, hato’o hafoin seremónia isar bandeira iha kampu Ladi, ohin.
Notísia relevante:Komunidade menus partisipa iha seremónia komemorasaun 20 Maiu
Autoridade ne’e dehan, prosesu atu identifika projetu hitu ne’e liuhusi reuniaun konsellu suku, hafoin ho nia prosesu hato’o mai iha Asembleia postu administrativu (ASPA) no sei kontinua mai aprezenta iha reuniaun konselu koordenasaun munisipál.
Tipu projetu ne’ebé identifika no kontinua hala’o iha munisípiu Kovalima mak hanesan reabilitasaun estrada, konstruisaun Uma merenda eskolár, konstrusaun sentru saúde no konstrusaun valeta.
“Ita hala’o hela ita-nia dezenvolvimentu iha munisípiu mak hanesan ita ko’alia grande projetu ne’ebé responsabiliza husi nasionál identifika ona estrada balun nune’e bele rezolve”, nia dehan.
Líder másimu Kovalima ne’e fó hanoin katak Autoridade hala’o dezenvolvimentu hanesan iha 2024 implementa projetu ualu liuhusi PDIM no aumenta ho uza orsamentu poupansa ida hamutuk projetu sia.
Atu implementa projetu ualu ne’e, nia prosesu liuhusi konkursu públiku. Projetu referidu empreza ualu mak sai manan-na’in ho totál orsamentu hamutuk $1,350,192.18 husi orsamentu ho nia kustu kontratu ho empreza hamutuk $ 1,192,943.34 ne’ebé totál orsamentu halo ona pagamentu $ 309,412.55 osan restu $ 157,248.84.
Tuir dadus, projetu ualu ne’ebé mak implementa iha 2024 mak hanesan, empreza ne’ebé implementasaun projetu ualu ne’e hanesan, empreza Savi Guju Unipesoal Lda halo konstrusaun morru hale’u edifísiu obra públika ho nia orsamentu husi PDIM $ 83,44.47, ho nia kustu kontratu $ 72,600.00, empreza Mandarin Unipesoal Lda halo konstrusaun salaun enkontru postu administrativu Fohorem $ 132,923.43 ho kustu kontratu $ 116,397.52.
Empreza Feto lima harii Eskola Bázika Filiál, Suku Matai, Postu Maukatar ho verba $ 87,931.39 nia kustu kontratu $ 76,921.36, empreza Tofranditar Unipesoál Lda halo Konstrusuan laboratóriu Sentru Saúde Komunitáriu (SSK) Zumalai, iha suku Zulo $ 87,022.60 ho nia kustu kontratu ho empreza $ 86,121.61,
Aleinde ne’e empreza Queenzha Falov Unipesoal Lda harii merkadu iha postu Suai verba orsamentu $ 137,277.14, kustu kontratu $ 120,118.70, empreza Jino Linda Unipesoal Lda konstrusaun kanál irigasaun Bauraikun iha aldeia Kulu-oan Suku Tashilin, postu Zumalai ho osan $ 192,141.00 ho kustu kontratu $ 167,420.90 no empreza Taroman Lakfa Unipesoal Lda rekonstrusaun Jardín foho Lakirin suku Holpilat postu Maukatar $ 155,798.80 kustu kontratu $ 140,219.00 empreza Bend Maha Male Unipesoal Lda harii rezidénsia ba médiku iha suku Holpilat $ 473,657.35 kustu konstratu $ 413,144.2.
Jornalista:Celestina Teles
Editór: Rafael Ximenes de A. Belo
