KOVALIMA, 20 Maiu 2025 (TATOLI) – Administradór Postu administrativu Maukatar, Laurentino de Jesus hamutuk xefe Suku haat ho nia estrutura sira komemora loron Restaurasaun independénsia ba dala 23 iha Suku Ogues, Postu Administrativu Maukatar, atu halibur komunidade sira.
Administradór Postu Administrativu Maukatar, Laurentino de Jesus dehan, razaun autoridade postu Maukatar deside komemora loron nasionál iha suku sira ho intensaun komunidade mós bele sente loron restaurasaun independénsia ida-ne’e importante.
Seremónia isar bandeira iha postu administrativu Maukatar, munisípiu Kovalima, Administradór postu administrativu Maucatar mak sai inspetór ba seremónia isar bandeira no hodi lee mensajen husi Prezidente Repúblikua José Ramos Horta.
“Ami organiza seremónia isar bandeira la’o ho di’ak tanba ami hala’o seremónia iha suku Ogues sira hodi halibur komuniade sira bele hatene kle’an kona-ba loron restaurasaun independénsia 20 Maiu”, Autoridade postu Maukatar, Laurentino de Jesus, dehan ba jornalista sira, iha resintu EBC Ogues, ohin.
Komunidade rasik mak entuziasmu
Iha komemorasaun ne’e, komunidade postu Maukatar iha inisiativa rasik atu partisipa seremónia isar bandeira mezmu postu la iha orsamentu atu sosa hahan ba komunidade sira.
“Ita la iha osan atu sosa alimentasaun ba komunidade maibé komunidade sira rasik mak entuziasmu atu partisipa seremónia isar bandeira, loron ida-ne’e ita la presiza atu fasilita hahan ba komunidade sira atu han”, nia dehan.
Autoridade postu esplika katak partisipasaun komunidade suku haat husi postu Maukatar másimu la’ós autoridade sira mak fasilita transporte maibé sira rasik mak iha inisiativa.
Atu komemora 20 Maiu postu Maukatar hetan alokasaun orsamentu husi munisípiu hamutuk hamutuk $ 8000. Husi orsamentu ne’e uza sosa atributu ba ekipa isar bandeira, uza ba lojístika no aloka orsamentu kada suku $ 25.00.
Postu administrativu Maukatar iha nia suku sira hanesan Suku Belekasak, Matai , Holpilat no suku Ogues.
Jornalista:Celestina Teles
Editór: Rafael Ximenes de A. Belo
