Ministériu Públiku alega pena suspensaun ba arguidu rasta faru Padre David
BAUKAU, 21 Maiu 2025 (TATOLI)—Ministériu Públiku (MP) liuhosi julgamentu primeiru interrogatóriu alega pena suspensaun ba arguidu inisiál SdC ligadu ho kazu rasta faru Padre David Savio, foin lalais ne’e.
Prosesu julgamentu primeiru interogatóriu kazu rasta faru Padre David Savio, SDB, rezulta MP fó-sai alegasaun ho pena suspensaun ba arguidu tanba konsidera hamosu krime danu simples ne’ebé previstu iha Kódigu Penál artigu 259.
“MP bazeia ba sira-nia faktu hatete katak laiha ofensa fízika, maibé iha danu (estraga) de’it faru entaun husu de’it pena suspensaun katak labele repete fali nia hahalok,” Defensór Públiku, Albino de Jesus Pereira hateten iha Tribunál Distritál Baukau, Vila Nova, kuarta ne’e.
Albino salienta, durante julgamentu, vítima fó perdaun ba arguidu ho razaun asaun ne’ebé akontese laiha intensaun direta maibé relasiona ho funsionáriu kartóriu balun ne’ebé hamosu emosaun husi arguidu.
Notísia relevante: Primeiru interrogatóriu kazu rasta faru Padre David adia ba semana oin
Mezmu Tribunál tenta halo rekonsialiasaun maibé bazeia ba ezijénsia husi sarani Kelikai nune’e vítima deside kontinua ba prosesu julgamentu tanba públiku liuhosi komunidade bele akompaña.
Parte defensór husu Tribunál atu fó pena admisaun ba arguidu tanba konsideradu kazu referidu laiha kategoria agravadu no asaun ne’ebé akontese hamosu emosaun husi arguidu.
“Arguidu halo asaun ne’e la’ós interese direta, maibé tanba iha motivasaun ne’ebé hamosu emosaun entaun aplika mak pena admisaun nune’e evita labele akontese tan,” Albino Perreira haktuir.
Kazu ne’e akontese iha loron 12 fulan-Maiu, iha Igreja Parókia Santa Terezinha Kelikai, komete husi suspeitu mane ho inisiál SdC (34) ne’ebé deskonfia ameasa no rasta vítima hodi rezulta kamiza nakles hafoin mosu dezentendimentu relasiona ho prosesu trata sertidaun batizmu.
Entretantu, tuir orariu julgamentu, sei realiza fali iha loron 02 fulan-Juñu tuku 09:00 Otl hodi rona desizaun husi Tribunál ne’ebé prezide husi juíza Maria Solana, Ministériu Públiku reprezenta husi Bartolomeu de Araújo no suspeitu SdC hetan asisténsia husi Defensór Públiku, Albino de Jesus Pereira.
Jornalista: Natalino Belo
Editór: Xisto Freitas da Piedade
