MSSI aloka $123.842 hodi apoiu pontuál ba ema vulnerável
DILI, 22 Maiu 2025 (TATOLI)–Ministériu Solidariedade Sosiál no Inkluzaun (MSSI) tinan ne’e aloka $123.842 ba programa apoiu pontuál ba ema vulnerável hamutuk 161 iha teritórriu.
“Nune’e gastu ona osan ne’e hamutuk $34.200 ba ema vulnerável 171, kompostu husi mane 85 no feto 86,” Vise-Ministra Solidariedade Sosiál no Inkluzaun, Céu Brites, informa ba Ajénsia Tatoli, iha ninia knaar fatin, MSSI, Kaikoli, kinta ne’e.
Apoiu pontuál nia lala’ok mak atu haree ba kondisaun ema ho defisiénsia, kondisaun uma, ai-han no halo empoderamentu ekonómiku.
“Ita iha programa pontuál ba ema vulnerável no ema ho difisiénsia, entaun Ministériu Solidariedade Sosiál no Inkluzaun hamutuk ho autoridade sira tenke to’o iha sira-nia fatin atu nune’e labele fó de’it apoiu maibé haree mós ba uma no asesmentu, se presiza Ministériu hamutuk ho autoridade lokál ho família ema ho defisiénsia fó apoiu,” nia akresenta.
Notísia relevante : MSSI prevee rihun $225 hodi atribui apoiu pontuál ba sobrevivente sira
Vise-Ministra dehan, MSSI apoiu ba ema ho defisiénsia sira liuhusi tipu oinoin, hanesan materiál uma no empoderamentu ekonomia.
“Iha faze primeiru ida-ne’e apoiu ona ema 171, kada ema ho montante $200 nomós haree ba kondisaun hadi’a hela fatin. Ita mós apoiu negósiu auto sustentável ho nia montante $2.000 ba maluk ema ho defisiénsia ne’ebé ita konsidera hanesan vulnerável,” governante ne’e tenik.
Husi oramentu ne’e mak sei kria kios no fó sasán para benefisiáriu programa sira bele fa’an.
“Ida-ne’e ita halo hanesan iha Aileu, ita hadi’a fatin depois ita kompra sasán maibé ba sira ida-ne’ebé hakarak duni atu halo negósiu,” nia katak.
Jornalista : Osória Marques
Editora : Julia Chatarina
