DILI, 22 Maiu 2025 (TATOLI) – Ministériu Solidariedade Sosiál no Inkluzaun (MSSI) husu ba Asosiasaun Direitus Umanus (HAK) atu kontinua habelar informasaun no advokasia direitu inkluzaun sosiál (ema defisiénsia) no ema ho diversidade (LGBTQI+) ba iha área rurál no la’ós iha de’it nível nasionál.
Ministra Solidariedade Sosiál no Inkluzaun Verónica das Dores hateten katak papél no servisu HAK ne’e importante tebes atu halo advokasia direitus ema hotu-nia nune’e di’ak liu labele halo de’it iha nivél nasionál maibé presiza iplementa mós ba iha baze liuliu área rurál sira.
“Karik haree tenpu mak permite bele mós implementa programa sira iha área rurál atu ema sira iha baze mós bele komprende tanba dalaruma iha rai-ne’ebé lahanesan mai ho karaktér mós lahanesan hodi uza terminolójia defisiénsia nia laloos”, Ministra ne’e informa ba jornalista sira iha sede HAK, Farol Dili, ohin.
“Ema sidadaun ne’ebé hela iha sidade ne’e bele komprende terminolójia defisiénsia nian tanba asesu informasaun iha mídia loroloron maibé komunidade balun iha foho lanaran asesu informasaun husi mídia entaun ladun hatene terminolójia loloos husi karakterístika defisiénsia nian,” governante ne’e kompara.
Iha fatin hanesan, Diretór HAK, Feliciano da Costa de Araújo hateten, implementasaun programa iha baze liuliu área rurál ne’e hanesan objetivu luta husi inísiu no durante ne’e sira mós hetan apoiu servisu ida husi PLAN Internasionál hodi implementa programa advokasia inkluzaun sosiál iha munisípiu sira hanesan Ermera, Ainaru no Dili durante fulan tolu.
“Maibé atu hateten de’it katak programa ida-ne’e la’o tinan naruk tiha ona hodi implementa durante fulan tolu nia laran, bainhira ami submete proposta ba PLAN no sira mós aseita tanba durante ne’e sira hatene katak HAK durante ne’e ko’alia kona-ba direitus umanus”, Diretór ne’e haktuir.
Atu kontinua habelar advokasia ba iha área rurál ne’e, tuir sosiedade sívil ne’e katak sei la hotu no agora daudaun iha hela intervensaun ba munisípiu tolu ne’ebé mensiona maibé HAK mós hakarak tebes atu kobertura iha área hotu-hotu iha territóriu nasionál para bele redús tensaun sira gosta halo diskriminasaun ba komunidade sira-ne’e liuliu ema ho defisiénsia no ema ho diversidade.
Tanba hanesan ema hotu hatene katak atu hapara bareira ba diskriminasaun ne’e difisíl uitoan maibé ita presiza hakotu korrente (bareira) husi akaun sira-ne’e HAK iha commitment (kompromisiu) boot tebes hodi halo advokasia hamutuk ho Governu liuhusi MSSI no parseiru dezenvolvimentu sira.
“Maibé dalabarak ita mós sempre hasoru dezafíu bainhira halo implementasaun programa sira-ne’e iha baze tanba dalaruma partisipasaun ema nia ladun barak no buat hotu mós bazeia ba fundus, kuandu fundus laiha entaun susar atu habelar di’ak liután ba baze sira seluk”, nia énfaze.
Notísia relevante:PLAN Internasionál TL kontinua promove advokasia ba inkluzaun sosiál
Jornalista: Alexandra da Costa
Editór: Rafael Ximenes de A. Belo
