DILI, 22 Maiu 2025 (TATOLI)–Prezidente Parlamentu Nasionál (PPN), Maria Fernanda Lay, reprezenta Estadu Timor-Leste partisipa misa inaugurasaun pontifikadu ba Papa Leão XIV, iha Basilika São Pedro, Roma – Vatikanu, iha loron 18 Maiu.
“Pela primeira vez, ha’u bá Roma, ida-ne’e mak ha’u kontente no lori Timor-Leste ninia reprezentatividade no ha’u husu ba Amu Papa iha momentu ha’u komprimenta no husu ninia bensaun ba ita Timor laran tomak, povu Timor-Leste,” PPN, Maria Fernanda Lay, haktuir ba Ajénsia TATOLI iha resintu PN, kinta ne’e.
PPN partisipa iha serimónia ne’e ho delegasaun hamutuk 200-resin ne’ebé hanesan reprezentante nível altu husi nasaun lubun iha mundu.
“Ha’u bá reprezenta Prezidente Repúblika, klaru katak viajen dook, maibé ha’u hanoin ha’u akompaña mós balun iha Facebook, sira hateten dehan ha’u la rein Amu Papa nia liman, la loos, tanba iha ne’ebá virus konstipasaun no mear, ne’ebé Amu Papa mós dada ninia liman, la’ós hotu-hotu só ida ka rua de’it mak rein Amu Papa nia liman,” nia akresenta.
Hodi hatutan: “Maneira komprimenta la’ós rein nia liman, maibé ha’u hanoin ita-boot sira haree únika que halo veña ba Santu Padre, klaru katak ha’u orgulu tebes iha oportunidade ba hetan ho Sua Santidade Papa Leão.”
Notísiarelevante : Papa Leão XIV apela ba libertasaun jornalista ne’ebé detidu tanba buka lia-loos
Nia haktuir, komprimenta labele lori tempu naruk tanba iha delegasaun 200-resin mak komprimenta.
“Hau hato’o ba nia (Amu Papa Leão) katak kongratulasaun ba nia simu pose no ha’u hateten ha’u mai reprezenta Prezidente Republika no husu bensaun ba populsaun Timor Leste tomak,” Maria Fernanda Lay, katak.
Jornalista : Nelson de Sousa
Editora : Julia Chatarina
