DILI, 22 Maiu 2025 (TATOLI) – Ministériu Administrasaun Estatál (MAE) liuhusi Diresaun Jerál Dezentralizasaun no Governu Lokál loke konkursu públiku ba kandidatu foun Prezidente Autoridade Munisipál (PAM) Dili.
Diretór Jerál Dezentralizasaun Governu Lokál, António Agostu Guterres hateten, kandidatu nu’udar timoroan, laharee ba idade no seluktan importante iha esperénsia administrasaun públika ne’ebé relevante.
Rekezitu ba konkorre vaga ne’e mak hanesan, konkorrente tenke hatama rekerimentu ne’ebé sei dirije ba MAE, fotokópia kartaun eleitorál, Billete identidade (BI), sertidaun RDTL, abilitasaun literária ne’ebé legalizadu husi Ministériu Edukasaun (ME), iha esperiénsia servisu no iha sertifikadu relevante ba konkursu ne’e, kurríkulu vitae no dokumentus sira tenke tau iha envelope.
“Konkursu ida-ne’e hahú loke husi loron 21 fulan Maiu to’o loron 03 fulan-Juñu 2025,” Diretór Jerál ne’e informa ba jornalista TATOLI, ohin.
Konkursu ne’e sei fó oportunidade ba kandidatu selesionadu na’in-ida de’it tuir prosesu rekrutamentu hanesan sei halo selesaun no avaliasaun ba dokumentu sira, no daruak nian desizaun finál no nomeasaun husi Primeiru-ministru no sob-proposta husi MAE (Ministériu Administrasaun Estatál).
Diretór-jerál António Agostu Guterres hateten, vaga kona-ba Autoridade Munisípiu Dili nian durante ne’e mamuk dezde iha loron 28 fulan-Janeiru bainhira PAM sesante, Gregório da Cunha Saldanha rezigna aan.
“Entaun Diresaun Jerál Governasaun Lokál maka sai interinu hodi halo funsionamentu administrasaun iha autoridade munisipál Dili nian,” nia dehan.
Ezekutivu ne’e relata, kargu ne’e sei mamuk entaun ne’e maka MAE fó sai anúnsia ida oinsá maka bele hetan kuríkulu vitae husi pesoál sira-ne’ebé profisionál no interresante hodi submete dokumentu no MAE bele haree hafoin hato’o sob-proposta ba Primeiru Ministru para bele hetan nomeasaun.
“Anúnsiu ne’e hasai mós bazeia ba matadalan ne’ebé Ministru Administrasaun Estatal, Tomas do Rosário Cabral asina no orientasaun ne’e desde iha kedas fulan Abríl nia laran ne’e”, nia haktuir.
Notísia relevante:MAE sei re-anunsia rekrutamentu foun ba PAM Dili
Jornalista: Alexandra da Costa
Editór: Rafael Ximenes de A. Belo
