VIKEKE, 22 Maiu 2025 (TATOLI)—Diretór Sekretáriu Estadu Formasaun Profesionál no Empregu (SEFOPE), Norberto Pereira Martins, informa SEFOPE munisípiu Vikeke fó teste mo entrevista ona kandidatu traballadór timoroan na’in-248 atu ba servisu iha Austrália.
Notísia Relevante: SEFOPE Vikeke finaliza formasaun lian Inglés ba kandidatu traballadór Austrália 221
“Kona-ba ita-nia kandidatu traballadór Austrália nian ne’ebé uluk tuir teste, maibé valór la to’o ka la liuhusi munisípiu Vikeke hamutuk na’in-3777 ne’ebé fó fali oportunidade ba sira tuir kursu lian inglés iha sentru akréditadu sira. Kandidtu sira-ne’e ramata ona sira-nia kursu ba lian englés no aprezenta sira-nia sertifikadu, nune’e ami fó ona teste entrevista ba ema hamutuk na’in-(248),” Norberto Pereira Martins hateten ba Agência TATOLI, iha ninia kna’ar fatin, ohin.
Diretór SEFOPE ne’e hatutan, teste entrevista ne’e formadór oferese pergunta hamutuk 10 no kada pergunta ida ho valór 10, maibé husi pergunta sira-ne’e mak kandidatu sira la resposta mak sira sei la hetan valór.
“Tanba kada pergunta sira-ne’e ita sei konta hamutuk tenke hetan valór liu 50 ba leten, hafoin bele liu. Maibé valór husi 50 mai karik ne’e mak sira sei la pasa maibé sira la sai husi programa ida-ne’e. Ita fó nafatin oportunidade sira ba tuir formasaun lian inglés, depois sira mai tuir fali teste entrevista,” nia dehan.
Kona-ba rezultadu teste entrevista, nia dehan, kandidatu sira-ne’ebé tuir teste entrevista ne’e SEFOPE seidauk fó sai sira-nia valor no sei hein kandidatu sira bainhira ramata entrevista mak valór sira ne’e foin haruka ba nasionál.
“Ami seidauk fó sai rezultadu teste entrevista ba ita-nia kandidatu sira, teste hotu mak ami foin haruka lista ba diresaun naasionál hodi haree na’in hira mak pasa no na’in hira mak la pasa. Diresaun nasionál mak sei haree hodi prodús fila-fali kandidatu sira-nia númeru referénsia, depois mak haruka fila ba ami, hafoin ita taka sai rezultadu iha Vikeke,” nia haktuir.
Nia dehan, teste entrevista ne’e SEFOPE fó data limitasaun ba kandidatu sira, konforme kandidatu sira marka presenza iha SEFOPE Vikeke mak foin formadór sira fó teste ientrevista.
“Tanba ne’e, ha’u husu kandidatu traballadr sira-ne’e, tuir kursu lian inglés iha sentru sira-ne’ebé sente aan seidauk tuir teste karik mai tuir. Tanba, oportunidade ne’e mai dala ida, di’ak-liu partisipa hodi naran iha sistema no sai traballadór bá rai-li’ur. Ba ami, servisu SEFOPE Vikeke laiha diretu atu impede traballadór sira-nia diretu ne’e laiha. Hanesan Vikeke-oan, ita nafatin fó oportunidade ba malu. Tan ne’e, husu ita hotu nian partisipasaun hodi aproveita oportunidade sira-ne’ebé iha,” nia dehan.
Jornalista : Vitorino Lopes da Costa
Editór : Cancio Ximenes
