Ministru Miguel fó pose ba membru foun Konsellu Administrasaun ACCTL 

DILI, 23 Maiu 2025 (TATOLI) — Ministru Transporte no Komunikasaun, Miguel Marques Gonçalves Manetelu, sesta ne’e fó pose ba membru foun Konsellu Administrasaun Autoridade Aviasaun Sivíl (AACTL, sigla portugés).

Konsellu Administrasuan foun AACTL mak hanesan; Zezinho António Gusmão nu’udar Prezidente AACTL, Maria Luísa Monteiro no Cornélio Vasconcelos, nuúdar membru Konsellu Administrasaun AACTL nian.

Ministru Minguel, informa, nomeiasaun ba Konsellu Administrasaun AACTL ne’e, refleta sira-nia esperiénsia, dedikasaun no prontidaun atu foti responsabilidade krítiku sira, hodi fó avansu liután ba setór aviasaun nian.

“Serimónia ohin nian, la’ós de’it afirma ita-nia papél lideransa nian maibé mós reforsa ita-nia kompromisu nasionál atu apoia padraun aviasaun internasionál sira. Nu’udar Estadu-membru Organizasaun Internasional Aviasaun Sivil (ICAO, sigla portugés), Timor-Leste iha responsabilidade atu dezenvolve sistema aviasaun sivíl ida-ne’ebé seguru, efisiente no responsável,” Miguel Marque Manitelu, hateten iha salaun MTK, Kaikoli, Dili.

Nia subliña, funsionamentu di’ak husi Autoridade Aviasaun Sivíl ne’e independente no ho rekursu di’ak, la’ós de’it nu’udar rekizitu ba reguladór tuir ICAO, maibé mós nu’udar pilár ensensiál ida atu hetan konfiansa globál ba setór aviasaun nian.

Nia esplika, bainhira Timor-Leste buka atu habelar nia ligasaun aérreu internasionál no muda ba integrasaun rejionál ne’ebé luan, liuliu iha kontestu membru ASEAN nian, papél AACTL nian sai estratéjiku no nesesáriu liután.

“Ha’’u hakarak aproveita momentu ida ne’e hodi fó lembra ba Konsellu Administrasaun foun atu sempre lembra katak, ita-boot sira-nia knaar mak atu halo monitorizasaun, inspesaun, supervizaun no regulasaun ba atividade aviasaun sivíl sira hotu, ho objetivu atu garante seguransa sistema transporte áerreu iha Timor-Leste no responsável atu hala’o funsaun hodi Governu Timor-Leste nia naran, tuir konvensaun ne’ebé define kona-ba Organizasaun Internasional Aviasaun Sivil (ICAO),” Miguel hateten.

Maibe nia husu, bainhira hala’o funsaun ida ne’e tenke kondús estratéjia polítika, vizaun no responsabilidade, ikus ba atinjimentu programa sira mak membru Governu ne’ebé tutela ba.

“Tanba ne’e, ha’u sempre repete bebeik atu ita servisu hamutuk, hodi konkista objetivu ida ba dezenvolvimentu nian, liuhusi realiza saida mak ita promete atu halo tuir programa IX Governu Konstitusional nian,” governante fó hanoin.

Membru Governu husu ba Konsellu administrasaun foun favór lembra katak, ministériu ida-ne’e boot tebes, ho ajénsia tutela hamutuk lima ne’ebé kaer setór importante rua, transportes no telekomunikasaun.

Tanba ne’e, ezije serbisu iha ekipa, serbisu ho responsabilidade no respeita idak-idak nia serbisu maibé komplementa ba malu nafatin.

“Ha’u hakarak aproveita tempu ida-ne’e, hodi rekoñese ho formalmente kontribuisaun no dedikasaun husi membru konsellu sesante, Prezidente ho fokál na’in-rua, ita-boot sira-nia loialidade, serbisu makaas no susesu tomak, sei kontinua rejista iha jornada AACTL no MTK nian ba oin,” Ministru Transporte no Komunikasaun fó hanoin.

Eis-Prezidente AACTL, Eusébio Freitas, agradese ba VIII Governu tanba fó ona responsabilidade ba sira durante tinan-haat hala’o serbisu iha AACTL.

“Bainhira ami simu pose iha komimentu balu neébe ami tenta taubele la’o-tuir mak hanesan Autoridade Aviasaun Sivíl nafatin halo fiskalizasaun ba dezenvolvimentu ita-nia aeroportu, serbisu sertifikasaun ba aeroportu hanesan ita hotu hatene katak iha VIII Governu ita konsege sertifika tiha ita-nia AIPNL no daudaun IX Governu autoridade foun hein bele sertifika tán aeroportu Rota do Sândalo no Suai, inklui serbisu lubuk ida mai ita halo ona no seluk autoridade foun bele kontinua,” nia dehan.

Prezidente AACTL, Zezinho António Gusmão, agradese ba konfiansa ne’ebé Governu IX fó ona ba sira nu’udar Konsellu Administrasaun foun AACTL nian.

“Ami mós halo kedas koordenasaun ho konsellu sesante hodi apár serbisu sira, ami presiza ajusta no presiza atu kontinua halo, tanba serbisu aviasaun nia presiza koordenasaun, ami mós halo ona fiskalizasaun ba aeroportu internasionál Nicolau Lobato nian ne’ebé ANATL,I.P nu’udar jestór, garante nafatin aeroportu kumpre rekizitu pardraun internasionál ICAO nian,” nia dehan.

Servisu no organizmu hirak-ne’ebé tutela iha Ministru Transporte no Komunikasaun: Administrasaun Portu Timor-Leste (APORTIL, sigla portugés), Administrasaun Aeroportu no Navigasaun Aérrea Timor-Leste, E.P. (ANATL E.P. sigla portugés), Autoridade Aviasaun Sivíl Timor-Leste (AACTL, sigla portugés), Autoridade Nasionál Komunikasaun (ANC, sigla portugés) no Ajénsia Teknolojia Informasaun no Komunikasaun, I.P. – TIC TIMOR.

Notísia relevante: Governu ezonera Eusébio Freitas husi kargu Prezidente AACTL

Jornalista : Arminda Fonseca

Editór : Evaristo Soares Martins