KOVALIMA, 23 Maiu 2025 (TATOLI) – Komandu Polísia Nasionál Timor-Leste (PNTL) munisipiu Kovalima, daudaun-ne’e, estabelese ona estrutura Konsellu Polísiamentu Komunitáriu (KPK) iha suku rua, iha Postu administrativu Suai, Munisípiu Kovalima.
Reprezentante Komandante PNTL Munisípiu Kovalima, Superintendente Asistente Polísia, Joaquim da Costa dehan, Komandu PNTL Kovalima estabelese ona estrutura KPK iha suku mak hanesan Suku Kamnasa no Suku Debos.
“Komandu PNTL munisípiu Kovalima hamutuk ho parseiru The Asean Fundation fulan-ne’e fasilita ona formasaun ba estrutura KPK iha postu Suai, ita identifika suku Kamnasa no suku Debos estabelese ona estrutura KPK”,Superintendente Asistente Polísia, Joaquim da Costa, relata ba jornalista sira, iha komandu PNTL Kovalima Santa Rosa, ohin.
Reprezentante Komante PNTL Kovalima ne’e, klarifika, kona-ba kontinuasaun atu estabelese estrutura KPK iha suku sira seluk sei iha prosesu nia laran hodi rona husi parseiru The Asean Fundation hafoin mak kontinua estabelese estrutura iha suku sira seluk ne’ebé ba pertense ba munisípiu Kovalima.
Enkuantu, Munisípiu Kovalima iha nia postu administrativu sira hanesan, Fatululik, Fatumea, Fohorem, Tilomar, Maukatar Suai no Zumalai ho nia suku 30 ne’ebé daudaun ne’e PNTLestabelese ona estrutura KPK iha Suku rua, falta suku 28 mak seidauk estrabelese.
Fó hanoin fali katak bazeia ba ajenda tuku 9:00 , iha loron 9 Maiu ne’e, estrutura KPK kompostu husi Prezidente KPK ho nia membru na’in-32 husi Suku Debos, Postu Suai simu ona pose. Aleinde Ajente iha lorokoraik tuku 14:00, ohin, kontinua hala’o atividade fó pose ba estrutura KPK iha suku Debos ne’ebé pertense ba postu Suai, Munisípiu Kovalima.
Notísia relevante:Líder KPK Debos proibe membru uza farda partisipa seremónia kultura
Jornalista:Celestina Teles
Editór: Rafael Ximenes de A. Belo
