KOVALIMA, 09 Maiu 2025 (TATOLI) – Prezidente Konsellu Polisiamentu Komunitáriu (KPK) Suku Debos, Agustinho da Silva, fó hanoin ba membru KPK atu labele uza farda KPK partisipa iha seremónia kultura hanesan lia – mate ka moris, iha aldeia no suku.
“Ita uza farda KPK hanesan konsellu ida iha suku ita-nia liña koordenasaun ho polísia tenke metin atu redús problema iha aldeia. Farda KPK labele uza hodi ba asiste lia no iha kualker tempu bainhira uza farda iha momentu atende problema ruma iha aldeia no bairru iha suku, la’ós atu amostra iha aldeia ha’u KPK mak ne’e atu hatudu aan no foti aan hodi hasoru ita-nia komunidade. Servisu KPK atu atende no haree problema mosu iha aldeia”, Prezidente KPK Debos hato’o iha nia diskursu iha seremónia pose ba membru KPK iha suku Debos, ohin.
Ho nune’e hanesan prezidente KPK sei kontrola membru KPK bainhira uza farda loron baibain – hanesan prezidente sei halo kontrolu.
Hafoin simu pose tuun aprezenta aan ba aldeia sira hodi fó koñesementu ba komunidade kona-ba estabelesementu KPK.
Reprezentante Komandante, PNTL munisípiu Kovalima, Superintendente Quintino da Costa reforsa, servisu KPK bazeia ba deklarasaun no kompromisiu lee iha juramentu hanesan parseiru entre polísia ho komunidade
“Ita hotu hatene, estabelese KPK, hanesan polítika Governu liuhusi PNTL hamutuk ho parseiru The Asean Fundation fasilita treinamentu ho objetivu atu hametin relasaun polísia ho komunidade”, nia dehan
Polísia mai husi komunidade no komunidade mós sente hanesan na’in ba polísia iha suku Debos atu garante seguransa iha suku rasik. “Ita estabese KPK iha suku molok ne’e polísia suku intensaun Governu hatudu katak polísia tenke hamutuk ho komunidade atu kombate aktu krime sira iha suku”, nia informa.
Pesoál no grupu sempre kria instabilidade iha bairru-laran ladun hakmatek, viziñu sente la hakmatek tanba barullu, ema ne’ebé atu konvense no hakalma joven sira mak KPK.
Objetivu estabelese KPK hamutuk hodi prevene konflitu komunitáriu iha suku mai hamutuk hodi estabiliza situasaun iha suku laran.
Ho nune’e, KPK nia lema mak ‘Vizibilidade’ signifika loroloron polísia hamutuk ho komunidade, ‘Envolvimentu’ signifika envolve KPK atu haree ba estabilidade seguransa no Prosimidade (VIP)
“Ita tenke servisu hamutuk halo kooperasaun di’ak kualker kazu ne’ebé mosu iha suku laran durante tuir formasaun ita-boot sira iha ona koñesementu kona-ba meiu atu atende kazu, tipu problema sira hanesan kazu sívil hanesan Violénsia doméstika, hadau malu rai”, nia fó hanoin.
Bazeia ba dadus, membru KPK ne’ebé mak simu pose iha Postu administrativu Suai, suku Debos hamutuk 32.
Membru sira ne’e molok atu simu pose, prezidente agredese no garante sei fasilita formasaun kona-ba servisu KPK nian iha suku no aldeia.
Jornalista:Celestina Teles
Editór: Rafael Ximenes de A. Belo
