DILI, 06 Novembru 2025 (TATOLI)—Ofisiál Superiór Polísia Nasionál Timor-Leste (PNTL) na’in-ida ho inisiál AQ suspeitadu envolve iha kazu falsifikasaun dokumentu ba verifikasaun dokumentu veteranu iha Munisípiu Lautein.
Portavós interinu Komandu PNTL Superintendente Asistente Polísia Mouzinho Correia esplika, Komandu Jerál PNTL hatún ona despaisu atu husu parte Diresaun Nasionál Servisu Investigasaun Kriminál (DNSIK) atu hakle’an investigasaun.
“Despaisu tun ona ba Diresaun Servisu ne’ebé responsabilidade kriminál, ita sei halo tuir planu no asaun. Naturalmente ita sei buka testamuña sira, liuliu mós ba Komisaun Verifikasaun Dadus Veteranu Munisípiu Lautein,” Mouzinho Correia hateten ba Jornalista sira iha sala konferénsia impresa Ministériu Interiór Vila-Verde, Kinta ne’e.
Notísia relevante : Idozu na’in-haat devolve rihun $2-resin ba Estadu tanba falsifika dokumentu
Maski nune’e, Komandu seidauk bele halo konkluzaun ruma ba kazu ida-ne’e.
Iha parte seluk, PNTL mós notifika ona ema na’in-rua ne’ebé molok ne’e apresenta ona keixa mai Polísia relasiona ho kazu ne’e.
“Iha tempu badak ekipa ida sei bá iha Munisípiu Lautein hodi rekolla tan informasaun ba parte relevante sira,” nia katak.
Jornalista : Natalino Costa
Editora : Julia Chatarina
