DILI, 23 Maiu 2025 (TATOLI)-Timor-Leste Coalition for Education (TLCE) liuhusi Diretór Nasionál, José Monteiro, husu ba governu atu mellora programa merenda eskolár, tanba ne’e presiza iha polítika di’ak.
“Ha’u hanoin polítika merenda eskolár ne’e volume aumenta, ho intensaun atu ajusta mudansa sira ne’ebé nesesariu hodi mellora di’ak liután, merenda eskolár ida agora di’ak liu duke ida uluk”, dehan dirijente ne’e ba TATOLI iha nia kna’ar fatin Kaikoli, sesta ne’e.
Tuir nia, merenda eskolár ida agora di’ak liu kompara ho uluk, tanba profesór sira la envolve ona iha prosesu preparativu. “Profesór sira konsentra de’it ba preparasaun planu aula no fasilita prosesu aprendizajen ba estudante sira”.
Nia akresenta objetivu husi merenda eskolár mak hamenus má nutrisaun, maibé presiza haree didiak nutrisaun kada estudante. Tanba ne’e, ministériu edukasaun presiza servisu hamutuk ho ministériu saúde.
“Ita presiza iha planu dieta alimentar kada estudante ne’ebe presiza han barak no han uituan, atu bele rekomenda ba komisaun merenda eskolár nune’e komisaun merenda eskolár entrega ba kozineira sira presiza prepara hahan tuir rekomendasaun ne’ebe iha.
Monteiro mós husu atu haforsa monitorizasaun iha implementasaun. “Ita haree dalabarak inspetór ida de’it kontrola eskola kuaze 50 resin, entaun semana ida labele kobre hotu, rekursu umanu ki’ik kompara ho demanda estudante ne’ebé boot entaun inspetór labele kobre hotu”.
Nia dehan dezafiu ne’ebé uluk to’o agora la rezolve mak orsamentu sempre tarde, nune’e afeita ba merenda eskolár tanba primeiru trimestre estudante sira labele han, tama segundu trimestre mak foin han maibé orsamentu tinan ida entaun orsamentu fulan Janeiru to’o Marsu tenke fila ba kofre Estadu, segundu dezafiu mak transfere osan husi munisípiu ba konta bankária eskola nian.
Notísia relevante: Governu garante kualidade implementasaun programa Merenda Eskolár
Jornalista : Osória Marques
Editora : Rita Almeida
