DILI, 21 Maiu 2025 (TATOLI)—Governu liuhusi Ministériu Edukasaun (ME), Ministériu Administrasaun Estatál (MAE) no Ministériu Saúde (MS) garante kualidade implementasaun programa Merenda Eskolár iha territóriu.
“Ministériu Edukasaun mezmu agora ami la’ós responsável direitamente ba Merenda Eskolár, maibé tanba eskola ne’e iha papél Ministériu Esukasaun nian, maka ami hamutuk ho Ministériu Administrasaun Estatál no Ministériu Saúde serbisu hamutuk atu garante Merenda Eskolár ne’e bele la’o di’ak liután,” Ministra Edukasaun, Dulce de Jesus, hato’o iha resintu Parlamentu, kuarta ne’e.
Nia dehan, foin daudaun Governu liuhusi ministériu tolu ne’e estabelese dekretu ida atu hadi’a programa nasionál ne’e.
Notísia relevante : MAE disemina manuál Programa merenda eskolár ba implementadór sira
Antes ne’e, Prezidente Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu, Kultura no Sidadania, Armando dos Santos, relata katak fiskalizasaun komisaun nian iha eskola sira iha munisípiu balun identifika katak presiza mellora programa Merenda Eskolár.
“Merenda Eskolar uluk Ministériu Edukasaun sei jere ho sentavu 0,25 ba kada estudante, ne’e sei di’ak duke ida agora sa’e ba sentavu 0,42 ne’e diretamente ba iha hahán alunu sira-nia. Ida-ne’e agora entrega ba iha Prezidente Autoridade Munisípiu (PAM) mak jere, entaun sira seidauk iha esperiénsia, aleinde ida-ne’e mós manuál ne’e sira hases-an husi inspetór sira-nia knaar,” nia katak.
Nune’e, Prezidente Komisaun G rekomenda atu halo revizaun filafali ba manuál merenda eskolar.
Tinan ne’e Governu aloka millaun $34 ba implementasaun programa merenda eskolár iha eskola hotu iha territóriu tomak.
Programa Merenda Eskolár ne’e mosu nu’udar inisiativa estratéjika ida hodi garante asesu universál no ekuitativu ba refeisaun nutritiva iha estabelesimentu edukasaun pré-eskolár no ensinu báziku iha país.
Objetivu husi programa ida-ne’e maka la’ós de’it atu kombate inseguransa ai-han no hadi’a dezempeñu eskolár, maibé mós atu promove dezenvolvimentu sustentável ba komunidade lokál sira liuhusi enkoraja produsaun no konsumu ai-han husi agrikultura lokál.
Jornalista : Nelson de Sousa
Editora : Julia Chatarina
