DILI, 25 Maiu 2025 (TATOLI)—Gabinete Komunikasaun Prezidensiál Filipinas nian (PCO – Presidential Communications Office) liuhusi ninia website ofisiál ne’ebé publika iha loron 22 Maiu 2025, manifesta Filipina nia apoiu ba adezaun plena Timor-Leste ba Asosiasaun Nasoins Sudeste Aziátiku (ASEAN, sigla inglés).
Tuir nota ne’ebé Ajénsia TATOLI asesu deklarasaun ne’e hato’o husi Sekretáriu-Adjuntu Departamentu Negósius Estranjeirus Filipina, Dominic Xavier Imperial, durante konferénsia imprensa ida iha Malacañang, iha loron 22 Maiu, iha ámbitu preparasaun ba Simeira ASEAN 2025 ne’ebé sei hala’o iha Kuala Lumpur, Malázia, iha loron 26 to’o 27 Maiu.
Notísia relevante : Hun Sen partilla razaun estratéjika ba adezaun Kamboja iha ASEAN ba membru PN
Simeira ne’e sei prezide husi Primeiru-Ministru Malázia, Dato’ Seri Anwar Ibrahim, ho tema ‘Inkluzaun no Sustentabilidade’.
“Ami apoia Timor-Leste nia adezaun ba ASEAN”, Dominic Xavier Imperial, adirma hodi subliña katak asuntu ne’e “konserteza tama iha ajenda” sorumutu líder ASEAN nian.
Responsável ne’e hatutan tan katak membru ASEAN tuir hela roteiru ida ba Timor-Leste nia adezaun ba bloku rejionál ne’e, ne’ebé hatudu grupu ne’e nia kompromisu kontínuu atu aumenta númeru membru ASEAN nian.
Apoiu públiku ida-ne’e husi Filipina reforsa esforsu sira ne’ebé Timor-Leste halo hodi kumpre kritériu ne’ebé estabelese ona iha Roteiru ba Adezaun Plena, liuliu iha aliñamentu jurídiku, institusionál no polítiku ho pilár tolu Komunidade ASEAN nian.
Governu Timor-Leste reafirma ninia determinasaun atu kontribui ho forma konstrutiva ba objetivus ASEAN no renova ninia kompromisu atu hametin kooperasaun ho Estadu-membru sira hotu, ba benefísiu dame, estabilidade no dezenvolvimentu sustentável iha rejiaun ne’e.
TATOLI
