AHDRO preukupa edifísiu Autoridade Bobonaru laiha asesiblidade ba EhD
BOBONARU, 26 Maiu 2025 (TATOLI)—Koordenadora Advokasia Asosisaun Halibur Defisiénsia Rejiaun Oeste (AHDRO) Munisípiu Bobonaru, Maria Fátima Gouveia, preokupa ho konstrusaun edifísiu Administrasaun Autoridade Munisipál Bobonaru tanba laiha asesiblidade ba Ema ho Defisiénsia (EhD) sira.
Notísia Relevante: Estadu tenke halo polítika hodi responde ba “Ema ho Defisiénsia Sira”
“Ha’u hano’in atu liga fali ba asesiblidade iha fatin públiku sira seidauk másimu. Ita foti ezemplu, fatuk ohin ami liu mai ne’e mós laiha asesiblidade. Depois pior-liu Salaun Munisípiu Bobonaru nian, maluk ema ho defisiénsia sira labele asesu ba espasu iha fatin ne’ebá,” Nia informa ba Jornalista sira iha Salaun Maria-Tapo, segunda ne’e
Nia observa, ema ho defisiénsia (EhD) sira seidauk hetan direitu protesaun propriu, tanba ne’e nia rekomenda ba autoridade munisípiu Bobonaru bainhira konstrui edifisíu no fasilidade públiku ruma tenke tau importánsia mós ba asuntu ema ho defisiénsia sira.
Aleinde ne’e, nia hatutan, bainhira realiza atividade ruma ne’ebé involve ema ho defisiénsia (EhD) presiza buka fatin ne’ebé iha espasu no asesiblidade ba ema ho defisiénsia (EhD) sira.
“Ami ema ho defisiénsia sira mós iha direitu no obrigasaun hanesan ho sidadaun hotu-hotu ne’ebé ho kondisaun normal,” nia dehan.
Sekretáriu Autoridade Munisípiu Bobonaru ba asuntu Sosiál no Organizasaun Komunitária, Julio Carvalho Caerro, rekoñese edifisíu Autoridade Munisípiu Bobonaru laiha espasu ka asesibilidade ba ema ho defisiénsia (EhD) sira no konstrusaun foun salaun Maria-Tapo mós laiha asesiblidade no la prienxe kriteria.
“Ha’u husu deskulpa ba imi tanba imi tama mai sa’e eskada de’it, mós ha’u hanoin ne’e mak monu agora halo nusa loos. Ha’u mós hakarak fó hatene tan de’it, ida-ne’e mak xefe suku Holsa nunka mai iha ne’e. Xefe suku ne’e dehan, ha’u ba mak keramik ida nabilan ha’u kois monu tiha, ne’ebé xefe suku ne’e kunadu enkontru iha ne’e nia nunka mai partisipa,” nia dehan.
Nia rekoñese, ida-ne’e Autoridade Munisípiu Bobonaru ninia frakeza maibé ba oin sei haree no sei toma konsiderasaun ba asuntu ema ho defisiénsia sira-nian.
“Liuliu fatin públiku sira-ne’ebé mak atendementu ne’e tenke obrigatoriu, la’ós halo diskriminasaun,” nia hateten.
Enkuantu, tuir dadus ne’ebé Tatoli asesu hatudu katak membru ativu ne’ebé duadaun ne’e hamahan-aan iha AHDRO hamutuk ema na’in-308.
Notísia Relevante: AHDRO husu AMB prioriza asuntu defisiénsia iha OJE 2024
Jornalista : Sergio da Cruz
Editór : Cancio Ximenes
