Inspetór eskolár Likisá preokupa apoiu operasionál
DILI, 26 Maiu 2025 (TATOLI)–Inspetora Pre-Eskolár Likisá, Lucia Oliveira Martins, dehan inspetór eskolár sira preokupa apoiu operasionál ba atividade inspesaun ba eskola sira ne’ebé dala-barak ho distansia dook.
Nia haktuir apoiu operasionál ne’e akontese iha 2014 até 2017. Maibé, husi 2017 to’o agora laiha ona hodi difikulta sira nia atividade inspesaun bá fatin ne’ebé la’ós besik.
“Ami atu halo monitorizasaun ba eskola sira loron-loron, ami la hetan apoiu operasionál hola bee ruma iha dalan ne’e laiha, maibé ohin rona rasik husi Ministra Edukasaun katak sei iha planu atu ekilíbriu ba orsamentu, nune’e labele iha ministériu de’it tenke tun iha munisípiu sira, liu-liu inspesaun sira iha munisípiu hodi apoiu netik ami banhira ami ba monitorizasaun ba eskola sira”, nia dehan.
Ministra Edukasaun, Dulce de Jesus Soares, hatán ba preokupasaun katak, kona-ba kombustivel ne’e la’ós la hetan, maibé sei ladún to’o, maibé sei ladún to’o entaun ME buka meiu hodi responde.
“Ami koko atu halo tranferénsia iha verba ruma iha diresaun, apoiu inspesaun sira ba kustu operasionál, nune’e sira bele halo sira-nia servisu ho di’ak liután”, nia dehan.
Maibé ME sei halo análiza ida tanba inspetór sira nia área inspesaun la hanesan. “Neste momentu ami tenke halo analiza atu haree, tanba iha inspetor sira ne’e área kobertura la hanesan, balun eskola barak, no balun uitoan, no balun área ne’ebé besik no balun dook liu entaun ita tenke analiza, maibé prosesu ne’e la’o hela. Ha’u hein katak fulan-Jullu tinan-ne’e bele iha aumenta uitoan ba sira nian operasaun”, dehan nia.
Notísia relevante: Inspetór eskolár iha territóriu sei hetan motorizada hodi tulun sira halo serbisu
Jornalista : Osória Marques
Editora : Rita Almeida
