DILI, 06 dezembru 2023 (TATOLI) – Ministériu Edukasaun (ME) liuhusi Gabinete Inspesaun Jerál prepara ona motorizada hamutuk 96 atu distribui ba inspetór eskolár sira hodi apoia sira-nian atividade.
Auditór Inspesaun Jerál ME, Rudolfo Henrique Aparício, informa katak motorizada 96 ho marka Honda Verza ne’ebé gabinete prepara ne’e daudaun sei iha hela prosesu trata dokumentu sira antes fahe.
“Motorizada 96 ne’e ita seidauk distribui tanba ita sei trata lai dokumentu sira inklui sei halo renovasaun xapa matríkula ba Governu. Kuandu prosesu administrasaun hotu ona maka ita foin bele distribui”, dehan ba Tatoli iha Vila Verde, ohin.
Transporte ne’e ministériu sosa ho osan hamutuk rihun $186-resin no prosesu sira ne’e liuhusi aprovizionamentu ne’ebé loke konkursu públiku depois maka kompañia sira kompete.
Diretór Nasionál Lojistika no Teknolojia, Pedro dos Reis, relata katak motorizada 96 ne’ebé Gabinete Inspesaun Jerál sosa ne’e tau hela iha lojístika no seidauk iha orden atu distribui tanba sei trata dokumentu sira.
“Ita sei hein hela despaxu distribuisaun, maibé dokumentu ba motorizada sira ne’e sei iha hela prosesu, tan ne’e seidauk iha orientasaun husi superiór sira kona-ba serimónia distribuisaun refere”, dehan.
Ih sorin seluk, Inspetór Eskolár Munisípiu Dili, Aniceto Pedro da Costa, realsa katak motorizda ne’ebé Ministériu Edukasaun prepara ona atu distribui ba sira ne’e konsidera asaun pozitivu tebes tanba bele tulun serbisu inspetór sira-nian.
“La’ós transporte ne’e maka atu tulun Inspetór sira atu hala’o serbisu, maibé durante ne’e servisu inspesaun iha eskola sira kontinua halo tanba ida ne’e responsabilidade inspetór eskolár sira-nian”, afirma.
Jornalista: Tomé Amado
Editora: Maria Auxiliadora
